منی پور میں تشدد اور خواتین کی برہنہ پریڈ معاملہ میں سپریم کورٹ پیر کو کرے گا سماعت

نئی دہلی: منی پور میں تشدد اور خواتین کی برہنہ پریڈ کے معاملے میں سپریم کورٹ میں آج سماعت نہیں ہو سکے گی۔ رپورٹ کے مطابق سی جے آئی (چیف جسٹس آف انڈیا) ڈی وائی چندر چوڑ آج دستیاب نہیں ہیں، لہذا اب اس معاملے کی سماعت پیر کو ہوگی۔

قبل ازیں وزارت داخلہ نے جمعرات کو سپریم کورٹ میں حلف نامہ داخل کرتے ہوئے بتایا کہ منی پور وائرل ویڈیو (برہنہ پریڈ) کیس کی تحقیقات سی بی آئی کو سونپ دی گئی ہے۔ ویڈیو بنانے والے شخص کو گرفتار کر لیا گیا ہے، جس موبائل سے ویڈیو بنائی گئی تھی وہ بھی برآمد کر لیا گیا ہے۔ بتایا جا رہا ہے کہ اس کیس کی سماعت منی پور سے باہر ہوگی۔

وہیں، مرکزی حکومت کے مطابق منی پور میں تشدد کے واقعات میں کمی آئی ہے اور 18 جولائی کے بعد سے کسی کی موت نہیں ہوئی۔ نیز وزارت داخلہ میتئی اور کوکی تنظیموں کے ساتھ رابطے میں ہے۔ حالات کو معمول پر لانے کے لیے مسلسل بات چیت جاری ہے۔ مرکزی حکومت نے سپریم کورٹ میں حلف نامہ داخل کرکے یہ تمام معلومات فراہم کی ہیں۔

حکومت نے سپریم کورٹ سے استدعا کی ہے کہ مقدمے کی کارروائی 6 ماہ میں مکمل کرنے کی ہدایت کی جائے۔ خیال رہے کہ گزشتہ جمعرات کو منی پور میں خواتین کے ساتھ بربریت کا ویڈیو منظر عام پر آنے کے بعد ملک کی سپریم کورٹ نے اس معاملے کا ازخود نوٹس لیا تھا اور مرکز اور منی پور حکومت سے کہا تھا کہ یا تو آپ کارروائی کریں یا ہم کریں گے!

منی پور کے وائرل ویڈیو معاملے میں اب تک 7 لوگوں کو گرفتار کیا جا چکا ہے۔ کانگ پوکپی ضلع میں 4 مئی کو ایک ہجوم کے ذریعہ دو خواتین کو برہنہ کرکے پریڈ کرنے کا واقعہ کا انکشاف 19 جولائی کو منظر عام پر آنے واالی ویڈیو کے ذریعے ہوا۔