وجے چوک پر 1000 ڈرونز سے آسمان جگمگا اٹھا

قومی دارالحکومت کے وجے چوک میں ہفتہ کے روز منعقدہ بیٹنگ ریٹریٹ کے دوران 1000 سے زیادہ ڈرونز نے شائقین کو مسحور کیا اور حب الوطنی کے جذبے سے سامعین کو اپنی لپیٹ میں لے لیا۔

بیٹنگ دی ریٹریٹ کی تقریب کے اختتام پر پہلی بار لائٹ شو کے ایک حصے کے طور پر 1000 ڈرونزسے ناقابل فراموش پری ریکارڈ شدہ اور میوزیکل پریزنٹیشن پیش کیاگیا۔ اس کے ساتھ ہی ہندوستان چین، روس اور برطانیہ کے بعد چوتھا ملک بن گیا جس نے 1000 ڈرونز کے ساتھ اتنے بڑے پیمانے پر ڈرون شو کا اہتمام کیا۔

بیٹنگ ریٹریٹ کی تقریب کے اختتام کے موقع پر لیزر شو کے دوران 'وندے ماترم' کی دھن بجائی گئی۔ اسٹارٹ اپ Botlab Dynamics کی طرف سے آزادی کے امرت مہوتسو کے ضمن میں 10 منٹ کے ڈرون شو کا اہتمام کیا گیا تھا۔

دستے کے کمانڈر نے بیٹنگ ریٹریٹ تقریب کا اختتام کرنے کے لیے صدر کی منظوری طلب کی، جس کے ساتھ افواج نے اپنے کیمپوں میں واپسی پریڈ شروع کی۔ واپسی پریڈ میں بینڈ نے 'سارے جہاں سے اچھا' کی دھن بجائی۔

بیٹنگ دی ریٹریٹ کے موقع پر آرمی کے بینڈ نے 'اے میرے وطن کے لوگوں' کی دھن بجائی جس نے سب کو مسحور کردیا۔ تقریب میں موجود صدر جمہوریہ رام ناتھ کووند، وزیر اعظم نریندر مودی، وزیر دفاع راج ناتھ سنگھ نے تالیوں سے اس کا خیر مقدم کیا۔

بیٹنگ ریٹریٹ کے موقع پر راشٹرپتی بھون بشمول نارتھ بلاک ساؤتھ بلاک کو رنگ برنگی قمقموں سے سجایا گیا تھا۔ صدر جمہوریہ رام ناتھ کووند اس پروگرام میں مہمان خصوصی تھے۔ پروگرام میں فوج، بحریہ، فضائیہ اور سنٹرل آرمڈ پولیس فورسز کے بینڈز کے ذریعہ 26 دھنیں بجائی گئیں۔ فوج کے مارچ کرنے والے دستوں نے وجے چوک پر 'قدم قدم بڑھے جا' کی دھن پر پریڈ کی، جو قابل دید تھی۔

اس بار بیٹنگ ریٹریٹ میں مہاتما گاندھی کے پسندیدہ بھجن کی دھن'ابائیڈ ود می' نہیں سنائی دی۔ بیٹنگ ریٹریٹ کے لیے 26 گانے ریکارڈ کیے گئے تھے، جن میں 'ابائیڈ ود می' شامل نہیں تھا۔ یہ مہاتما گاندھی کی برسی سے ایک دن پہلے 29 جنوری کو منعقد ہونے والی بیٹنگ ریٹریٹ تقریب کے اختتام پر سنایا جاتا تھا۔

اس بار بیٹنگ ریٹریٹ میں 'کیرالہ'، 'ہند کی سینا' اور 'اے میرے وطن کے لوگو' کی دھنیں بنیادی طور پر شامل تھیں۔ بگلرز نے اقبال کے لکھے ہوئے گیت سارے جہاں سے اچھا کی دھن بجائی۔ پوری تقریب میں 44 بگلرز، 16 ٹرمپیٹ پلیئرز اور 75 ڈرمر نے حصہ لیا۔