سلمان خان کے گھر پر فائرنگ معاملہ میں استعمال کردہ بندوق کی تلاش جاری، تاپی ندی میں چل رہا سرچ آپریشن!

سلمان خان کے گھر پر ہوئی فائرنگ معاملے میں ممبئی کرائم برانچ کی ٹیم سورت پہنچی ہوئی ہے۔ کرائم برانچ کی ٹیم اس فائرنگ میں استعمال کی گئی بندوق کی تلاش تاپی ندی میں کر رہی ہے اور اس کے لیے خصوصی غوطہ خوروں کا انتظام کیا گیا ہے۔ ذرائع کے حوالے سے میڈیا میں آ رہی خبروں میں بتایا جا رہا ہے کہ اس فائرنگ واقعہ میں جس بندوق کا استعمال کیا گیا ہے، اسے تلاش کرنے کے لیے ممبئی کرائم برانچ کی ٹیم سورت پہنچی ہے۔

دراصل ملزمین نے پوچھ تاچھ کے دوران کرائم برانچ کو بتایا ہے کہ انھوں نے واردات کو انجام دینے کے بعد بندوق سورت کی ایک بڑی ندی میں پھینک دی تھی۔ یہی وجہ ہے کہ کرائم برانچ کی ٹیم سورت میں سرچ آپریشن چلا رہی ہے۔ مقامی انتظامیہ کی مدد سے غوطہ خوروں کا انتظام کیا گیا ہے۔ انکاؤنٹر اسپیشلسٹ دیا نایک کرائم برانچ یونٹ 9 کے انچارج ہیں۔ اپنی ٹیم کے اتھ وہ گجرات پہنچے ہیں۔

واضح رہے کہ سلمان خان کے گھر پر ہوئی فائرنگ معاملے میں ممبئی کرائم برانچ نے گزشتہ ہفتہ کے روز لارنس بشنوئی اور انمول بشنوئی کو ملزم بنایا تھا اور کیس میں کئی نئی دفعات جوڑے گئے ہیں۔ ممبئی کرائم برانچ انمول بشنوئی کے خلاف جلد ہی لُک آؤٹ نوٹس جاری کرنے کی تیاری میں بھی ہے۔ کہا جا رہا ہے کہ انمول بشنوئی ہی اس فائرنگ واقعہ کا ماسٹر مائنڈ ہے اور اس وقت وہ بیرون ملک میں ہے۔