بہار یونیورسٹی کے 80 ہزار طلبا کا ریزلٹ غائب! اسکور کارڈ ڈیلیٹ کیے جانے سے طلبا حیران و پریشان

بہار یونیورسٹی سے منسلک تقریباً 80 ہزار طلبا کا ریزلٹ اچانک غائب ہو جانے سے طلبا کے درمیان ایک ہنگامہ برپا ہو گیا ہے۔ ریزلٹ غائب ہونے کی وجہ یہ ہے کہ یونیورسٹی سے منسلک ایک ایجنسی نے اپنی ویب سائٹ سے بڑی تعداد میں اسکور کارڈ کو ڈیلیٹ کر دیا ہے۔ ویب سائٹ پر ریزلٹ موجود نہ ہونے سے طلبا حیران و پریشان ہیں۔ گریجویشن 21-2020 امتحان کا ریزلٹ غائب بتایا جا رہا ہے اور اب ان طلبا کی مشکلات کا کوئی حل بھی دکھائی نہیں دے رہا۔

میڈیا رپورٹس کے مطابق جس ایجنسی نے اپنی ویب سائٹ سے طلبا کا ریزلٹ ہٹایا ہے، وہ دراصل یونیورسٹی سے علیحدہ ہو چکی ہے۔ اس ایجنسی کا تعلق لکھنؤ سے ہے جو بابا صاحب بھیم راؤ امبیڈکر بہار یونیورسٹی سے جڑی ہوئی تھی اور اب یہ انسلاک ختم ہو چکا ہے۔ یونیورسٹی سے تعلق ختم ہونے کے بعد اس ایجنسی نے مکمل ڈاٹا ہٹا دیا ہے۔ اب گریجویشن کے ساتھ ساتھ پوسٹ گریجویشن کے طلبا کو بھی پریشانی کا سامنا کرنا پڑ رہا ہے۔ ریزلٹ نہیں ملنے کی وہج سے طلبا اپنی مارک شیٹ میں موجود خامی کو درست بھی نہیں کرا پا رہے ہیں۔ حالانکہ ایسی خبریں سامنے آ رہی ہیں کہ ایجنسی کی طرف سے سبھی ریزلٹ کو ٹیبولیشن کیا جا رہا ہے۔ اس سے طلبا کی پریشانیاں ختم ہو سکتی ہیں۔

موصولہ اطلاعات کے مطابق بہار یونیورسٹی کی طرف سے اب سبھی ریزلٹ کا تجزیہ کیا جائے گا اور اس کے بعد ہی نتائج کا اعلان ہوگا۔ یونیورسٹی انتظامیہ نے اس سلسلے میں ہدایت جاری کر دی ہے۔ امتحان شروع ہونے سے پہلے یونیورسٹی موضوع کے مطابق اگزامنر کی تقرری کرے گا۔ اگر کوئی بھی طلبا ایک یا دو نمبر سے فیل ہو رہا ہے تو اس کی کاپیوں کی جانچ پھر سے کی جائے گی۔ ان سبھی کارروائی کو پورا کرنے کے بعد ہی یونیورسٹی کسی بھی امتحان کا ریزلٹ جاری کرے گا۔