دہلی حکومت نے منیش سسودیا کو سونپی گرفتار ستیندر جین کی ذمہ داریاں

دہلی کے نائب وزیر اعلیٰ منیش سسودیا کو صحت، داخلہ، بجلی، آب و صنعت محکموں کی اضافی ذمہ داریاں سونپی گئی ہیں، یہ محکمے پہلے ستیندر جین کے پاس تھے۔ ای ڈی نے گزشتہ پیر کے روز ستیندر جین کو منی لانڈرنگ کے ایک معاملے میں گرفتار کیا تھا اور منگل کو ایک عدالت نے انھیں 9 جون تک ای ڈی کی حراست میں بھیج دیا تھا۔

دہلی حکومت کے جنرل ایڈمنسٹریشن ڈیپارٹمنٹ کے ذریعہ بدھ کو جاری ایک نوٹیفکیشن میں کہا گیا ہے کہ ’’جی این سی ٹی ڈی (کاروبار کا الاٹمنٹ) رول 193 کے ضابطہ 3 کے تحت حاصل اختیارات کا استعمال کرتے ہوئے لیفٹیننٹ گورنر اور وزیر اعلیٰ کے مشورے سے محکمہ صحت کا الاٹمنٹ کرتے ہیں۔ نائب وزیر اعلیٰ منیش سسودیا کو صنعت، بجلی، داخلہ، شہری ترقی، آبپاشی اور سیلاب کنٹرول و پانی، اس کے علاوہ ان کے پاس پہلے سے کچھ محکمات بھی ہیں۔‘‘

اس درمیان جمعرات کو ایک پریس کانفرنس کو خطاب کرتے ہوئے دہلی کے وزیر اعلیٰ اروند کیجریوال نے دعویٰ کیا کہ ذرائع نے انھیں کچھ مہینے پہلے ستیندر جین کی گرفتاری کی اطلاع دی تھی، اور انہی ذرائع نے اب بتایا ہے کہ مرکزی حکومت آنے والے دنوں میں منیش سسودیا کو بھی گرفتار کرے گی۔ انھوں نے کہا کہ ’’میں نے کچھ مہینے پہلے ہی اعلان کر دیا تھا کہ مرکزی حکومت ستیندر جین کو ایک فرضی معاملے میں گرفتار کرنے جا رہی ہے۔ قابل اعتبار ذرائع نے مجھے اب یہ بتایا ہے کہ منیش سسودیا کو جلد ہی گرفتار کیا جائے گا۔‘‘