صدارتی انتخاب دو افراد کی نہیں بلکہ دو نظریات کی جنگ ہے، اپوزیشن امیدوار یشونت سنہا کی اپیل جاری

نئی دہلی: صدارتی انتخاب میں حزب اختلاف کی جماعتوں کے مشترکہ امیدوار یشونت سنہا نے پیر کے روز ہونے والی ووٹنگ سے ایک روز قبل تمام سیاسی جماعتوں سے حمایت کی اپیل کی ہے۔ یشونت سنہا نے کہا ’’اس بار صدارتی انتخاب دو افراد کے درمیان نہیں بلکہ دو نظریات کے درمیان ہے۔ صرف ایک فریق ایسا ہے جو ہمارے آئین میں درج شقوں اور اقدار کا تحفظ چاہتا ہے۔ میں تمام ممبران پارلیمنٹ اور ارکان اسمبلی سے اپیل کرتا ہوں کہ اس بار آئین اور اپنے ضمیر کی آواز پر ووٹ کریں۔‘‘

تمام سیاسی جماعتوں کو مخاطب کرتے ہوئے اپنی اپیل میں یشونت سنہا نے کہا کہ وہ ہندوستان کی جمہوریت کے دفاع کے لیے کھڑے ہیں، جب کہ دروپدی مرمو کو ان لوگوں کی حمایت حاصل ہے جو روزانہ کی بنیاد پر جمہوریت پر حملہ کر رہے ہیں۔ انہوں نے کہا کہ "میں سیکولرازم کے دفاع کے لیے کھڑا ہوں، جو ہمارے آئین کا ایک تعرفی ستون ہے۔ میری حریف امیدوار ایک ایسی جماعت سے ہے جس نے اس ستون کو تباہ کرنے اور اکثریت کی بالادستی قائم کرنے کے عزم پر عمل کیا ہے۔"

یشونت سنہا نے کہا کہ میں اتفاق اور تعاون کی سیاست کی حوصلہ افزائی کے لیے کھڑا ہوں۔ میرے حریف امیدوار کو ایک ایسی جماعت کی حمایت حاصل ہے جو تصادم کی سیاست کرتی ہے۔ بی جے پی پر طنز کرتے ہوئے انہوں نے مزید کہا کہ اگر ان کی امیدوار دروپدی مرمو ہندوستان کی اگلی صدر منتخب ہوتی ہیں تو وہ ان لوگوں کے کنٹرول میں ہوں گی جن کا مقصد جمہوری ہندوستان کو کمیونسٹ چین کے راستے پر چلنے والے ہندوستان میں تبدیل کرنا ہے۔ سنہا نے اپیل میں کہا کہ ایک قوم، ایک پارٹی، ایک سپریم لیڈر کے خیال کو کیوں نہیں روکا جانا چاہیے؟ صرف آپ ہی اسے روک سکتے ہیں۔

یشونت سنہا نے ٹویٹر پر شیئر کی گئی ایک ویڈیو اپیل میں ملک کے تمام ارکان اسمبلی اور ارکان پارلیمنٹ سے اپنی سمجھ کے مطابق ووٹ ڈالنے کی اپیل کی۔ خیال رہے کہ ملک کے نئے صدر کا انتخاب پیر کے روز یعنی کل ہونا ہے جبکہ ووٹوں کی گنتی جمعرات کو ہوگی۔