فرضی ایگزِٹ پول سے کارکنان مایوس نہ ہوں، چوکنا اور ہوشیار رہیں: راہل گاندھی

نئی دہلی: کانگریس کے صدر راہل گاندھی نے لوک سبھا الیکشن پر ایگزٹ پول کو فرضی قرار دیتے ہوئے پارٹی کے کارکنان کو مایوس نہ ہونے اور ووٹوں کی گنتی ہونے تک چوکنا اور ہوشیار رہنے کی ہدایت دی ہے۔

راہل گاندھی نے کانگریس کے کارکنان کو مخاطب کرتے ہوئے اپنے پیغام میں کہا کہ ایگزٹ پول فرضی ہیں لہٰذا ان پر کان نہ دھریں۔ ایگزٹ پول کے ذریعے کانگریس کارکنان کے حوصلوں کو پست کرنے کی کوشش کی جا رہی ہے اس لیے کسی کو مایوس ہونے کی ضرورت نہیں ہے۔

انہوں نے ٹوئٹ کیا، ’کانگریس پارٹی کے پیارے کارکنان! آئندہ 24 گھنٹے بے حد اہم ہیں۔ چوکنا اور ہوشیار رہیں، خوف نہ کریں۔ آپ سچ کے لیے جد و جہد کر رہے ہیں۔ فرضی ایگزٹ پول کے پروپیگنڈہ سے مایوس نہ ہوں۔ خود اور کانگریس پارٹی پر یقین رکھیں۔ آپ کی محنت بے کار نہیں جائے گی۔ جے ہند....راہل گاندھی‘۔

قبل ازیں، مختلف ایگزٹ پول میں این ڈی اے کے دوبارہ برسراقتدار آنے کی پیشن گوئیوں کے بعد کانگریس جنرل سکریٹری پرینکا گاندھی نے پارٹی کارکنان کے نام ایک آڈیو پیغام جاری کیا ہے۔ گزشتہ روز جاری یہ پیغام پورے ملک میں موجود کانگریس کارکنان کو بھیجا گیا ہے اور کہا گیا ہے کہ وہ ایگزٹ پول پر بھروسہ نہ کریں کیونکہ اس کے پیچھے ایک سازش پوشیدہ ہے۔ پرینکا گاندھی نے اپنے پیغام میں دعویٰ کیا ہے کہ 23 مئی کو نتائج کانگریس کے حق میں آئیں گے اور پارٹی کارکنان کو ایگزٹ پول سے مایوس ہونے کی ضرورت نہیں ہے۔

پرینکا گاندھی نے اپنے اس آڈیو پیغام میں واضح لفظوں میں پارٹی کارکنان سے مخاطب ہوتے ہوئے کہا ہے کہ ’’پیارے کارکن بہنوں اور بھائیوں، افواہوں اور ایگزٹ پول سے ہمت مت ہاریے۔ یہ آپ کا حوصلہ توڑنے کے لیے پھیلائی جا رہے ہیں۔‘‘ پرینکا گاندھی مزید کہتی ہیں کہ ’’اس درمیان آپ کا محتاط رہنا مزید اہم ہو جاتا ہے۔ اسٹرانگ روم اور ووٹ شماری کے مراکز میں ڈٹے رہیے اور مستعد رہیے۔ ہمیں پوری امید ہے کہ ہماری محنت اور آپ کی محنت کا پھل ملے گا۔‘‘