تاریخی ’بھوج شالہ‘ احاطہ کے سروے سے ایک دن قبل سپریم کورٹ پہنچا مسلم فریق

مدھیہ پردیش ہائی کورٹ کے حکم کے مطابق دھار کی تاریخی بھوج شالہ کا کل سے اے ایس آئی سروے شروع ہونا ہے، لیکن اس سے ٹھیک ایک دن قبل مسلم فریق نے سپریم کورٹ کا رخ کر لیا ہے۔ مسلم فریق نے ہائی کورٹ کی اندور بنچ کے حکم پر اعتراض ظاہر کرتے ہوئے سپریم کورٹ کا دروازہ کھٹکھٹایا ہے۔ مسلم فریق نے یہ معاملہ چیف جسٹس آف انڈیا ڈی وائی چندرچوڑ کے سامنے لانے کی گزارش کی ہے۔

قابل ذکر ہے کہ ’ہندو فرنٹ فار جسٹس‘ کی عرضی پر ہائی کورٹ نے اے ایس آئی کی 5 رکنی کمیٹی تشکیل دے کر دو عرضی دہندگان کی موجودگی میں بھوج شالہ احاطے کا سروے کرانے کی ہدایت دی ہے۔ اس سروے کی رپورٹ بند لفافے میں دینے کا حکم بھی صادر کیا گیا ہے۔ کمیٹی کو اپنی رپورٹ 6 ہفتے کے اندر دینے کو کہا گیا ہے۔ اس سروے کے بعد طے ہوگا کہ بھوج شالہ پر آخر کس کا حق ہے۔

میڈیا رپورٹس کے مطابق افسران کا کہنا ہے کہ اے ایس آئی کی طرف سے مقامی پولیس اور انتظامیہ کو سروے سے متعلق سبھی جانکاری دے دی گئی ہے۔ عدالتی حکم کے مطابق بھوج شالہ احاطہ کا اے ایس آئی سروے 22 مارچ کی صبح ہی شروع کر دیا جائے گا۔ دھار کے پولیس سپرنٹنڈنٹ منوج کمار سنگھ نے بتایا کہ انھیں اس سلسلے میں اے ایس آئی کا خط ملا ہے۔