بلڈوزروں سے بی جے پی کو ریاست سے باہر چھڑوانے کا کام لیا جائے گا : مشرا

بہوجن سماج پارٹی (بی ایس پی) کے جنرل سکریٹری ستیش چندر مشرا نے اتر پردیش اسمبلی انتخابات میں سیاسی جماعتوں کے لیڈروں کی انتخابی مہم کی زبان کے معیار میں آئی گراوٹ پر تشویش ظاہر کرتے ہوئے کہا ہے کہ بی ایس پی کو چھوڑ کر کوئی دوسری پارٹی یا لیڈر عوامی مسائل پر بات نہیں کر رہا ہے۔

مشرا نے پیر کے روز آگرہ میں بی ایس پی امیدواروں کی مہم کے دوران ایک جلسہ عام سے خطاب کرتے ہوئے کہا کہ سیاست میں زبان کامعیار دن بہ دن گرتا جارہا ہے ۔ سماج وادی پارٹی (ایس پی) کے صدر اکھلیش یادو اور وزیر اعلیٰ یوگی آدتیہ ناتھ پر طنز کرتے ہوئے انہوں نے کہا ’’کوئی لال ٹوپی کی بات کرتا ہے، کوئی کسی کی گرمی نکالنے کی بات کرتا ہے، لیکن ترقی کی بات ان میں سے کوئی نہیں کرتا ہے ۔ ترقی کی بات صرف بی ایس پی اور بہن مایاوتی کرتی ہیں۔

انہوں نے کہا کہ ایس پی حکومت میں تو جرائم اور مجرموں کا غلبہ تھا ۔ وہیں اس سے پہلے بی ایس پی حکومت میں قانون کی حکمرانی تھی ۔ بی جے پی کو ہدف تنقید بناتے ہوئے انہوں نے کہا کہ جو’ وناش‘ کی بات کرتے ہیں وہ ’ وکاس ‘ کی بات نہیں سکتے۔ بی جے پی صرف وناش کی بات کرتی ہے۔

انہوں نے کہا کہ یوگی لوگوں کے گھروں پر بلڈوزر چلوانے اور انکاؤنٹر کرنے کی دھمکی دیتے ہیں۔ انہوں نے کہا کہ کسی ریاست کے وزیر اعلی کی ایسی زبان نہیں ہو سکتی۔ یوگی کو نشانہ بناتے ہوئے انہوں نے کہا کہ انتخابات کے بعد وزیر اعلیٰ لوگوں کے گھروں پر جو بلڈوزر چلوا رہے ہیں، ان ہی بلڈوزروں سے بی جے پی کے لوگوں کو ریاست سے باہر چھوڑنے کا کام کیا جائے گا ۔

انہوں نے کہا کہ لوگ جانتے ہیں کہ اتر پردیش میں صرف بی ایس پی کے دور میں ہی ترقی ہوئی تھی ۔ انہوں نے دعویٰ کیا کہ بی ایس پی صدر کے ساتھ پارٹی ووٹر چٹان کی طرح کھڑے ہیں ۔ یہ بات تمام مخالف جماعتیں بھی جانتی ہیں۔