حکومت نے سرمائی اجلاس سے قبل 2 دسمبر کو طلب کی کل جماعتی میٹنگ، کئی اہم ایشوز پر ہوگا تبادلہ خیال

پارلیمنٹ کا سرمائی اجلاس 4 دسمبر سے شروع ہونے والا ہے، اور اس سے ٹھیک پہلے مرکزی حکومت نے پارلیمانی کارروائی کو بہتر انداز میں چلانے کے مقصد سے کل جماعتی میٹنگ طلب کی ہے۔ یہ میٹنگ 2 دسمبر کو طلب کی گئی ہے اور امید ظاہر کی جا رہی ہے کہ کل جماعتی میٹنگ میں کئی اہم ایشوز پر تبادلہ خیال کیا جائے گا۔ سرمائی اجلاس میں پانچ ریاستوں کے اسمبلی انتخابات کے دوران اٹھے ایشوز کے ساتھ ساتھ مہوا موئترا کے ’پیسہ لے کر سوال‘ معاملے پر ہنگامہ ہونے کے آثار ہیں۔

قابل ذکر ہے کہ عموماً اجلاس شروع ہونے سے ایک دن پہلے کل جماعتی میٹنگ طلب کی جاتی ہے۔ یعنی 3 دسمبر کو میٹنگ ہوتی، لیکن 3 دسمبر کو ہی پانچ ریاستوں میں ہوئے اسمبلی انتخابات کا نتیجہ برآمد ہونا ہے۔ اسی لیے کل جماعتی میٹنگ 2 دسمبر کو بلائی گئی ہے۔ 4 دسمبر سے شروع ہونے والے سرمائی اجلاس میں خوب ہنگامہ ہونے کے آثار دکھائی دے رہے ہیں۔ خاص طور سے 3 دسمبر کو پانچ ریاستوں کے اسمبلی انتخابات کے نتائج برآمد ہونے پر سبھی پارٹیاں پُرزور انداز میں ایشوز کو اجلاس میں اٹھاتی ہوئی نظر آ سکتی ہیں۔

امکان ظاہر کیا جا رہا ہے کہ ترنمول کانگریس کی رکن پارلیمنٹ مہوا موئترا کے خلاف پیسے لے کر پارلیمنٹ میں سوال پوچھنے کے معاملے میں لوک سبھا اخلاقیات کمیٹی کی رپورٹ بھی سرمائی اجلاس میں پیش کی جا سکتی ہے۔ پارلیمانی کمیٹی نے مہوا کو لوک سبھا سے معطل کرنے کی گزارش کی ہے۔ علاوہ ازیں اہم مجرمانہ قوانین کی جگہ پر لائے گئے تین بلوں پر اجلاس کے دوران غور کیے جانے کا بھی امکان ہے۔ داخلی امور کی اسٹینڈنگ کمیٹی نے حال ہی میں تین بلوں پر رپورٹ کو منظوری دی ہے۔ پارلیمنٹ میں زیر التوا اہم بل چیف الیکشن کمشنر اور الیکشن کمشنرز کی تقرری سے جڑا ہے جس پر ہنگامہ ہونے کا اندیشہ ہے۔