یوگی حکومت کے دوسرے میعاد کار کا پہلا بجٹ آج پیش ہوگا؛ کیا انتخابی وعدے پورے ہوں گے!

لکھنؤ: اتر پردیش میں لگاتار دوسری بار اقتدار میں واپسی کرنے والی یوگی حکومت آج اسمبلی میں ریاست کی تاریخ کا سب سے بڑا بجٹ پیش کرنے جا رہی ہے۔

یو این آئی کے مطابق وزیر اعلی یوگی آدتیہ ناتھ کی قیادت والی حکومت کا مالی سال 2022۔23 کے لئے 6.10 لاکھ کروڑ روپئے کا بجٹ 26 مئی کو وزیر مالیات سریش کمار کھنہ ایوان میں پیش کریں گے۔ ملحوظ رہے کہ ریاست کا سابقہ بجٹ 5.50 لاکھ کروڑ روپئے کا تھا۔ یوگی حکومت کے دوسرے میعاد کار کا یہ پہلا بجٹ ہوگا۔

حکومت اس بجٹ کے ذریعے اپنے انتخابی وعدے پورے کرنے کی کوشش کرے گی۔ وزیر خزانہ کی حیثیت سے کھنہ لگاتار چھٹی بار ایوان میں بجٹ پیش کریں گے۔ ان کے مطابق یہ بجٹ پیپر لیس ہونے کے ساتھ ساتھ ایک جامع بجٹ بھی ہوگا، جس میں ہر طبقے کا خیال رکھا جائے گا۔ انہوں نے بجٹ میں خواتین، نوجوانوں اور کسانوں کو ترجیح دی ہے۔ بجٹ رقم کے لحاظ سے یہ اتر پردیش کی تاریخ کا سب سے بڑا بجٹ ہوگا۔

اس بجٹ میں ریاستی حکومت کے’ سنکلپ پتر‘ کے سب سے اہم اعلانات میں شامل کسانوں کو آبپاشی کے لیے مفت بجلی فراہم کئے جانےکے وعدے کو پورا کرنے کا اعلان کیا جاسکتا ہے۔وزیر خزانہ نے بدھ کو اشارہ دیا ہے کہ حکومت اس بار بھی بجٹ کو کسانوں پر مرکوز رکھے گی۔

اس کے علاوہ محکمہ آبپاشی کو بجٹ میں 20 ہزار کروڑ روپے سے زیادہ کی رقم مختص کئے جانے کی امید ہے۔ وزیر اعلی زرعی آبپاشی اسکیم بھی اس بجٹ کی توجہ کا مرکز بن سکتی ہے۔ اس میں تمام چھوٹے اور پسماندہ کسانوں کے لیے بورویل، ٹیوب ویل، تالاب اور ٹینک کی تعمیر کے لیے گرانٹ کا انتظام ہوگا۔