فرٹیلائزر پلانٹ روزانہ 50 ٹن آکسیجن فراہم کریں گے: من سکھ مانڈویا
من سکھ مانڈویا نے کھاد کمپنیوں سے مطالبہ کیا کہ وہ اس وبا کے وقت آکسیجن پیدا کرکے اسپتالوں میں میڈیکل گریڈ آکسیجن کی فراہمی میں اضافہ کرکے معاشرے کی مدد کریں۔
نئی دہلی: ملک کے فرٹیلائزر پلانٹ کووڈ مریضوں کے علاج کے لئے روزانہ 50 ٹن میڈیکل آکسیجن فراہم کریں گے۔ وزیر مملکت برائے کیمیکلز و فرٹیلائزر من سکھ مانڈویا نے بدھ کو پبلک سیکٹر، نجی شعبے اور کوآپریٹو سیکٹر کی کھاد کمپنیوں کے ساتھ ایک اجلاس کی صدارت کی تاکہ ان کے پلانٹ میں آکسیجن کی پیداوار کے امکان کو تلاش کیا جاسکے۔
یہ بھی پڑھیں : مہاراشٹر، دہلی، اترپردیش میں کورونا سے سب سے زیادہ اموات
من سکھ مانڈویا نے کھاد کمپنیوں سے مطالبہ کیا کہ وہ اس وبا کے وقت آکسیجن پیدا کرنے کے لئے اپنی موجودہ صلاحیت کو دوبارہ حاصل کرکے اور اسپتالوں میں میڈیکل گریڈ آکسیجن کی فراہمی میں اضافہ کرکے معاشرے کی مدد کریں۔ کھاد کمپنیوں نے وزیر مملکت کے اس اقدام کا خیرمقدم کیا اور ملک میں کووڈ -19 صورتحال سے لڑنے کے لئے حکومت کی کوششوں میں شامل ہونے کے لئے گہری دلچسپی کا اظہار کیا۔
آئی ایف ایف سی او (ایفکو) گجرات میں اپنے کلول یونٹ میں ایک آکسیجن پلانٹ لگا رہا ہے جس کی گنجائش 200 مکعب میٹر فی گھنٹہ ہے اور ان کی مجموعی گنجائش یومیہ 33000 مکعب میٹر ہوگی۔ جی ایس ایف سی نے اپنے پلانٹ میں چھوٹی تبدیلیاں کی ہیں اور مائع آکسیجن کی فراہمی شروع کردی ہے۔
جی این ایف سی نے ائر سیپریشن یونٹ شروع کرنے کے بعد طبی مقصد کے لئے مائع آکسیجن کی فراہمی بھی شروع کردی ہے۔ جی ایس ایف ایس اور جی این ایف سی نے اپنی آکسیجن پیداواری صلاحیت میں اضافہ کرنے کا عمل پہلے ہی شروع کر دیا ہے۔ کھاد کی دیگر کمپنیاں سی ایس آر فنڈنگ کے ذریعے ملک کے چنندہ مقامات پر اسپتالوں میں میڈیکل پلانٹ لگائیں گی۔
مجموعی طور سے یہ توقع کی جاتی ہے کہ میڈیکل آکسیجن فرٹیلائزر پلانٹ کے ذریعہ کووڈ مریضوں کو روزانہ تقریبا 50 ٹن طبی آکسیجن دستیاب کرائی جاسکتی ہے۔ ان اقدامات سے آنے والے دنوں میں ملک کے اسپتالوں میں میڈیکل گریڈ آکسیجن کی فراہمی میں اضافہ ہوگا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔