شیواجی کا مجسمہ ٹوٹنا شندے حکومت کے لیے بنا دردِ سر، ایم وی اے اتحاد یکم ستمبر کو چلائے گا ’سرکار کو جوتا مارو‘ تحریک

چھترپتی شیواجی مہاراج کا مجسمہ ٹوٹنا مہاراشٹر کی شندے حکومت کے لیے دردِ سر بن گیا ہے۔ گزشتہ دنوں مہاراشٹر کے سندھو دُرگ میں موجود شیواجی مہاراج کا مجسمہ ٹوٹ کر گرا تھا اور اب اس معاملے میں زبردست سیاسی رنگ اختیار کر لیا ہے۔ اپوزیشن لیڈران کے ذریعہ اس معاملے میں لگاتار برسراقتدار طبقہ کو نشانہ بنایا جا رہا ہے، نتیجہ کار وزیر اعلیٰ ایکناتھ شندے اور نائب وزیر اعلیٰ اجیت پوار نے اس واقعہ پر معافی مانگ لی ہے۔ پھر بھی مہاراشٹر میں اپوزیشن اتحاد ’ایم وی اے‘ (مہاوکاس اگھاڑی) حکومت کے خلاف تحریک چلانے کو پرعزم دکھائی دے رہی ہے۔

ایم وی اے اتحاد نے برسراقتدار مہایوتی یعنی این ڈی اے حکومت کے خلاف محاذ کھولنے کا اعلان کر دیا ہے اور سڑکوں پر اترنے کا بھی ارادہ ظاہر کیا ہے۔ ایم وی اے نے ممبئی میں یکم ستمبر کو گیٹ وے آف انڈیا کے پاس چھترپتی شیواجی مہاراج کے مجسمہ کے سامنے ’سرکار کو جوتے مارو‘ تحریک چلانے کی اپیل کی ہے۔ اس دوران شیوسینا (یو بی ٹی) چیف ادھو ٹھاکرے، این سی پی (ایس پی) چیف شرد پوار اور کانگریس کے ریاستی صدر نانا پٹولے سمیت سبھی اہم اپوزیشن لیڈران موجود رہیں گے۔

ادھو ٹھاکرے نے تو ایم وی اے کی طرف سے تمام شیو سینکوں سے اس تحریک میں شامل ہونے کی اپیل کی ہے۔ میڈیا رپورٹ کے مطابق ایم وی اے لیڈران اور کارکنان اس دن ’ہتاتما چوک‘ سے گیٹ وے آف انڈیا تک بھی اس تحریک کے تحت مارچ کریں گے۔ غور کرنے والی بات یہ ہے کہ ایکناتھ شندے اور اجیت پوار نے بھلے ہی شیواجی کا مجسمہ ٹوٹنے کے معاملے میں افسوس ظاہر کرتے ہوئے معافی مانگ لی ہے، لیکن نائب وزیر اعلیٰ اور بی جے پی لیڈر دیویندر فڑنویس نے مجسمہ ٹوٹنے کے لیے پی ڈبلیو ڈی کو ذمہ دار ٹھہرایا ہے۔ اس تعلق سے ادھو کا کہنا ہے کہ آپ جو مورتی بناتے ہیں وہ تبھی بڑی ہوتی ہے جب آپ اس کی ٹھیک سے دیکھ بھال کرتے ہیں۔ اب وہ ایک دوسرے پر الزام لگا رہے ہیں۔ اس طرح کی بیان بازی ٹھیک نہیں کہ یہ مجسمہ پی ڈبلیو ڈی نے بنایا ہے، بحریہ نے بنایا ہے۔

اس درمیان سیاسی ماہرین کا ماننا ہے کہ جب جب چھترپتی شیواجی مہاراج کے تعلق سے کوئی تنازعہ پیدا ہوا ہے، تب تب ریاستی حکومتوں کو اس کا خمیازہ بھگتنا پڑا ہے۔ اسی لیے ایم وی اے اس معاملے کا استعمال این ڈی اے حکومت کے خلاف ہوا بنانے میں کر رہا ہے۔ تصور کیا جا رہا ہے کہ شیواجی مہاراج کا مجسہم ٹوٹنے کے بعد ریاست میں بڑے پیمانے پر حکومت کے خلاف ناراضگی ہے اور اسی کو دیکھتے ہوئے اپوزیشن اتحاد نے حکومت کے خلاف ’جوتے مارو تحریک‘ شروع کرنے کا ارادہ کیا ہے۔ مہایوتی کو بھی اس بات کا احساس ہے، اسی لیے پہلے وزیر اعلیٰ شندے اور پھر نائب وزیر اعلیٰ اجیت پوار نے معافی مانگ کر اس معاملے کو رفع دفع کرنا چاہا، لیکن یہ تنازعہ دھیرے دھیرے بڑھتا ہی جا رہا ہے۔