مرکزی حکومت نے میری ’بوسٹر ڈوز‘ کی صلاح مان لی، یہ ایک صحیح قدم ہے: راہل گاندھی

نئی دہلی: وزیر اعظم نریندر مودی نے ہفتہ کی شب قوم کے نام اپنے خطاب کے دوران اعلان کیا کہ ملک میں طبی اہلکاروں، فرنٹ لائن ورکرز اور 60 سے زیادہ عمر کے بزرگوں کو کورونا ویکسین کی اضافہ احتیاطی خوراک یعنی کہ ’بوسٹر ڈوز‘ فراہم کی جائے گی۔ اس پر کانگریس کے سابق صدر راہل گاندھی نے رد عمل ظاہر کرتے ہوئے کہا ہے کہ حکومت نے ان کی صلاح مان لی ہے اور یہ ایک صحیح قدم ہے۔

خیال رہے کہ وزیر اعظم نریندر مودی نے اعلان کیا ہے کہ طبی اہلکاروں اور فرنٹ لائن ورکرز کے علاوہ 60 سال سے زیادہ عمر کے لوگوں کو بوسٹر ڈوز فراہم کرنے کا سلسلہ 10 جنوری 2022 سے شروع کر دیا جائے گا۔ اس کے علاوہ انہوں نے 15 سے 18 سال کی عمر کے بچوں کی 3 جنوری سے ٹیکہ کاری شروع کرنے کا بھی اعلان کیا۔

راہل گاندھی نے ٹوئٹ کیا، ’’مرکزی حکومت نے بوسٹر ڈوز کی میری صلاح مان لی ہے۔ یہ ایک صحیح قدم ہے۔ ملک کے ہر شخص تک ویکسین اور بوسٹر کی حفاظت پہنچانی ہوگی۔‘‘

راہل گاندھی نے 22 دسمبر کو اپنے ٹوئٹ میں ملک کے شہریوں کو بوسٹر ڈوز فراہم کرنے کا مطالبہ کیا تھا۔ ایک خبر کا اسکرین شاٹ شیئر کرتے ہوئے راہل گاندھی نے ٹوئٹ کیا، ’’ملک کی آبادی کی اکثریت کی ٹیکہ کاری تاحال مکمل نہیں ہو سکی ہے۔ حکومت ہند بوسٹر ڈوز لگانی کب شروع کرے گی۔‘‘

راہل گاندی نے ٹوئٹ کے ساتھ جس خبر کو شیئر کیا اس کے مطابق ٹیکہ کاری کی موجودہ رفتار کے حساب سے دسمبر تک ملک کے 42 فیصد شہریوں کو ٹیکہ لگایا جا سکے گا۔ جبکہ کورونا کی تیسری لہر کو آنے سے روکنے کے لئے دسمبر تک ملک کے 60 فیصد شہریوں کی ٹیکہ کاری مکمل ہو جانی چاہئے۔ اس کے لئے ٹیکہ کاری کی موجودہ رفتار تقریباً 5.5 ملین ڈوز یومیہ سے بڑھا کر تقریباً 61 ملین یومیہ کئے جانے کی ضرورت ہے۔

وزیر اعظم نریندر مودی نے کورونا کے نئے ویرینٹ اومیکرون کے خدشات کے پس منظر میں قوم کے نام اپنے خطاب کے دوران کہا کہ اومیکرون کے معاملے تیزی سے بڑھ رہے ہیں۔ ایسے حالات میں ہمیں محتاط رہنے کی ضرورت ہے۔ انہوں نے مزید کہا کہ 15 سے 18 سال کی عمر والے بچوں کے لئے 3 جنوری سے ٹیکہ کاری کی شروعات کی جائے گی۔ وزیر اعظم نے کہا کہ 60 سال سے زیادہ عمر کے کوماربیڈیٹی (ایک سے زیادہ بیماری میں مبتلا) والے شہریوں کو ان کے ڈاکٹر کی صلاح پر احتیاطی خوراک فراہم کی جائے گی۔