یو پی میں جنگل راج کا 'خونی دائرہ' سی ایم ہاؤس تک آ پہنچا: پرینکا گاندھی

اتر پردیش کی یوگی حکومت میں جرائم کے واقعات لگاتار بڑھتے جا رہے ہیں۔ دن دہاڑے عام لوگوں کے ساتھ ساتھ سرکاری افسران کا قتل بھی روز مرہ کی بات ہو گئی ہے۔ تازہ معاملہ راجدھانی لکھنؤ کا ہے جہاں ریلوے افسر کی بیوی اور بیٹے کا قتل ہو گیا۔ اس واقعہ کے بعد کانگریس جنرل سکریٹری پرینکا گاندھی نے ریاست کی یوگی حکومت کو ایک بار پھر بڑھتے جرائم کے لیے ذمہ دار ٹھہراتے ہوئے تنقید کا نشانہ بنایا ہے۔ انھوں نے اپنے ایک فیس بک پوسٹ میں لکھا ہے کہ "یو پی کے وزیر اعلیٰ صاحب ایوان میں کچھ بھی بولیں، لیکن ان کی رہائش کے ٹھیک بغل، وی آئی پی ایریا میں دن دہاڑے ریلوے کے بڑے افسر آر ڈی واجپئی کی بیوی اور بیٹے کا قتل کر دیا جانا ظاہر کرتا ہے کہ یو پی میں جنگل راج کا خونی دائرہ وزیر اعلیٰ رہائش کے قریب تک آ پہنچا ہے۔"

پرینکا گاندھی نے فیس بک پوسٹ کے آخر میں یہ بھی لکھا ہے کہ "کئی خاندانوں کی اس جنگل راج میں اب روزانہ آہوتی (قربانی) دی جا رہی ہے۔ یہاں کوئی بھی، کہیں بھی محفوظ نہیں ہے۔" دراصل آئی آر ٹی ایس افسر راجیو دت کی بیوی اور 20 سالہ بیٹے کو برسرعام گولی مار کر جرائم پیشوں نے ہلاک کر دیا۔ واقعہ ہائی سیکورٹی زون گوتم پلی علاقہ میں پیش آیا ہے۔

بتایا جاتا ہے کہ سرکاری بنگلے میں گھس کر افسر کی بیوی اور بیٹے کو گولی ماری گئی ہے۔ وزیر اعلیٰ رہائش سے کچھ دوری پر واقع ریلوے کالونی میں سرزد ہوئے اس واقعہ کے بعد علاقے میں ہنگامہ برپا ہے۔ اعلیٰ افسران موقع پر پہنچ گئے ہیں اور آگے کی کارروائی کی جا رہی ہے۔ قابل ذکر بات یہ ہے کہ قتل اور عصمت دری کے واقعات اتر پردیش میں لگاتار بڑھ رہے ہیں اور پرینکا گاندھی اس کے خلاف آواز بھی اٹھا رہی ہیں، لیکن کوئی ٹھوس قدم ریاستی انتظامیہ کی طرف سے نہیں اٹھایا جا رہا ہے۔