ہنومان چالیسہ تنازعہ میں جیل گئیں نونیت رانا کی رِہائی کے لیے 8 سالہ بیٹی نے کیا ’ہنومان چالیسہ‘ کا پاٹھ

مہاراشٹر میں ہنومان چالیسہ کو لے کر جاری تنازعہ میں روزانہ کچھ نہ کچھ نیا سامنے آ رہا ہے۔ لاؤڈاسپیکر پر اذان دیئے جانے کو لے کر اعتراض، اور پھر وزیر اعلیٰ ادھو ٹھاکرے کی رہائش کے باہر ہنومان چالیسہ کا پاٹھ کرنے کی دھمکی دینے والی رکن پارلیمنٹ نونیت رانا اور ان کے شوہر رکن اسمبلی روی رانا اس وقت جیل میں بند ہیں۔ اب خبریں سامنے آ رہی ہیں کہ ان دونوں کی آٹھ سالہ بیٹی آروہی رانا نے اپنے والدین کی جیل سے رہائی کے لیے گھر پر ہنومان چالیسہ کا پاٹھ کیا ہے۔ یعنی جس ہنومان چالیسہ تنازعہ پر نونیت-روی کو جیل کے اندر ڈالا گیا ہے، اب اسی ہنومان چالیسہ کا پاٹھ کر ان کو چھڑانے کی کوشش شروع ہو گئی ہے۔

میڈیا رپورٹس کے مطابق آروہی رانا نے امراوتی میں اپنے والدین کی جیل سے جلد رہائی کے لیے اپنی رہائش پر ہنومان چالیسہ کا پاٹھ کیا۔ اس موقع پر آروہی نے میڈیا سے کہا کہ ’’میری ممی اور پاپا کو جلد ہی چھوڑ دیا جائے، اس لیے میں پوجا کر رہی ہوں۔‘‘ قابل ذکر ہے کہ جیل میں بند نونیت-روی کی ضمانت عرضی پر سیشن کورٹ میں آئندہ 29 اپریل کو سماعت ہونے والی ہے۔