’تاریخی جیت کے لیے کرناٹک کے لوگوں کا شکریہ‘، 5 گارنٹی پر مہر لگنے کے بعد سونیا گاندھی کا ویڈیو پیغام

کانگریس پارلیمانی پارٹی کی چیف سونیا گاندھی نے کرناٹک میں نو تشکیل کانگریس حکومت کو ہفتہ کے روز ایک ویڈیو پیغام کے ذریعہ مبارکباد پیش کی۔ ساتھ ہی کہا کہ ’’ریاست کا مینڈیٹ عوام اور غریبوں کے مفاد میں کام کرنے والی حکومت کے لیے ہے۔ لوگوں نے تقسیم کی سیاست اور بدعنوانی کو خارج کر دیا ہے۔‘‘ یہ ویڈیو پیغام تب سامنے آیا ہے جب ریاستی کابینہ کی پہلی میٹنگ میں ان 5 گارنٹیوں کو منظوری مل گئی جس کا وعدہ کانگریس نے بار بار اپنی انتخابی تشہیر کے دوران کیا تھا۔

سونیا گاندھی نے اپنے ویڈیو پیغام میں کرناٹک کی عوام کا شکریہ ادا کیا ہے اور اس بات پر خوشی ظاہر کی ہے کہ وزیر اعلیٰ سدارمیا کی قیادت میں ہوئی ریاستی کابینہ کی پہلی میٹنگ میں ہی کانگریس کی پانچوں گارنٹی کو منظوری دے دی گئی۔ کانگریس کی سابق صدر نے کہا کہ ’’میں کانگریس کو تاریخی مینڈیٹ دینے کے لیے کرناٹک کی عوام کا دل سے شکریہ کہتی ہوں۔ یہ مینڈیٹ عوامی مفاد میں کام کرنے والی حکومت، غریبوں کے مفاد میں کام کرنے والی حکومت کے لیے ہے۔ یہ تقسیم کی سیاست اور بدعنونای کو خارج کرنے والا (مینڈیٹ) ہے۔‘‘

اس سے قبل راہل گاندھی نے بھی ایک ویڈیو ٹوئٹ کر ریاست کرناٹک میں کانگریس حکومت کی پہلی کابینہ میٹنگ میں ہی 5 گارنٹی کو منظوری دیئے جانے کی اطلاع دیتے ہوئے یہ عزم ظاہر کیا کہ کانگریس اپنے سبھی وعدے پورے کرے گی۔ انھوں نے اس ٹوئٹ میں لکھا کہ ’’جو ہم کہتے ہیں، اسے پورا کرتے ہیں۔ پہلا دن، پہلی کابینہ میٹنگ- کرناٹک کو دی ہوئی ہماری 5 گارنٹی کو منظوری مل چکی ہے۔‘‘