دہلی میں دہشت گرد حملہ کا الرٹ! یومِ جمہوریہ کے پیش نظر حفاظت میں اضافہ، 6000 جوان تعینات، 150 کیمروں سے نگرانی

نئی دہلی: انٹیلی جنس ایجنسیوں کو یوم جمہوریہ سے قبل ممکنہ دہشت گردانہ حملے کی اطلاع ملنے کے بعد دہلی میں سخت حفاظتی انتظامات کیے گئے ہیں۔ دہلی کے تمام داخلی اور خارجی راستوں پر گاڑیوں کی مکمل چیکنگ کی جا رہی ہے۔ رپورٹ کے مطابق دہلی ضلع اور اس کے آس پاس 6000 سے زیادہ پولیس اہلکاروں کو تعینات کیا گیا ہے۔

ڈپٹی کمشنر آف پولیس پرناؤ تائل نے کہا کہ پولیس نے تقریباً 70000 لوگوں کے کئے انتظامات کیے ہیں۔ انہوں نے کہا کہ کسی بھی ناخوشگوار صورتحال سے نمٹنے کے لیے اسٹیٹک اور موبائل کوئیک رسپانس ٹیمیں چوکس رہیں گی۔ ڈی سی پی نے کہا ’’ہم نے دیگر ایجنسیوں کے ساتھ مل کر انسداد دہشت گردی کے اقدامات کو تیز کر دیا ہے۔ نیشنل سیکورٹی گارڈ کی ٹیمیں بھی تعینات کی جائیں گی۔‘‘

ڈی سی پی نے کہا ’’دہلی ہمیشہ سے ہی سماج دشمن عناصر کے نشانے پر رہی ہے۔ ایسے موقعوں پر خطرے کا تاثر بہت زیادہ ہوتا ہے۔ دھمکیوں کی خفیہ اطلاعات موصول ہوتی ہیں اور ہم نے اپنے حفاظتی آلات کو مضبوط کیا ہے۔‘‘ پولیس نے 150 نئے سی سی ٹی وی کیمرے بھی نصب کئے ہیں، جن میں سے کچھ میں چہرے کی شناخت کی سہولت موجود ہے، تاکہ ہر سماج دشمن عناصر کی نقل و حرکت پر نظر رکھی جا سکے۔

اس بار پولس نے یوم جمہوریہ پریڈ کے انٹری پاس میں ایک نیا سیکورٹی فیچر بھی شامل کیا ہے۔ ڈی سی پی نے کہا ’’ہر پاس یا ٹکٹ پر ایک کیو آر کوڈ ہوتا ہے۔ داخلہ صرف اس وقت دیا جائے گا جب اس کوڈ کو اسکین کیا جائے اور اسے لے جانے والے شخص کی شناخت اور تصدیق کر لی جائے گی۔‘‘ انہوں نے کہا کہ کسی بھی شخص کو بغیر پاس یا ٹکٹ کے ’کرتویہ پتھ‘ پر داخلے کی اجازت نہیں ہوگی۔

خیال رہے کہ دہلی پولیس نے پیر کو سیکورٹی وجوہات کی بنا پر قومی راجدھانی کی فضاف میں ذیلی روایتی فضائی گاڑیوں کی پرواز پر پابندی لگا دی تھی۔ دہلی پولیس کمشنر سنجے اروڑہ نے ایک حکم نامہ جاری کیا ہے جس میں پیرا گلائیڈرز، پیرا موٹرز، ہینگ گلائیڈرز، یو اے وی، مائیکرو لائٹ طیارہ، ریموٹ چلنے والے طیارے، گرم ہوا کے غبارے، چھوٹے طیارے، کواڈ کاپٹر جیسی ہوائی گاڑیوں کی پرواز پر پابندی لگا دی گئی ہے۔ طیارے سے چھلانگ لگانے پر 15 فروری تک پابندی عائد کی گئی ہے۔