تلنگانہ: زیر تعمیر زرعی ایتھنول پلانٹ کے خلاف کسانوں کا پرتشدد احتجاج

حیدرآباد: تلنگانہ کے نارائن پور ضلع کے ایک گاؤں میں اتوار کو ایک زیر تعمیر زرعی ایتھنول پلانٹ کے خلاف کسانوں کے احتجاج کے دوران تشدد پھوٹ پڑا۔ پولیس نے ہجوم پر لاٹھی چارج کیا جو پلانٹ تک مشینری کی نقل و حمل کو روکنے کی کوشش کر رہا تھا۔ اس کے بعد مظاہرین نے پولیس کی گاڑی کو آگ لگا دی۔

مریکال منڈل کے چتنور گاؤں میں اس وقت کشیدگی پھیل گئی جب مقامی لوگوں نے پلانٹ کے لیے مشینری لے جانے والی گاڑیوں کو روک دیا۔ پولیس نے مداخلت کرکے مظاہرین کو ہٹا دیا۔ جس سے دونوں پارٹیوں کے درمیان لڑائی ہو گئی۔ اس کے بعد پولیس نے مظاہرین کو منتشر کرنے کے لیے لاٹھی چارج کیا۔

پولیس کی کارروائی سے مشتعل گاؤں والوں نے پولیس کی گاڑی کو آگ لگا دی اور پتھراؤ کیا۔ جس میں ایک پولیس اہلکار زخمی ہو گیا۔ پولیس نے صورتحال پر قابو پانے کے لیے گاؤں میں اضافی دستے بھیجے۔

خیال رہے کہ چتنور اور آس پاس کے دیہات کے کسان ایتھنول پلانٹ کی مخالفت کر رہے ہیں کیونکہ انہیں خدشہ ہے کہ اس کے بعد کھیتوں کا پانی کارخانے کی طرف موڑ دیا جائے گا۔

چتنور، اخلاص پور اور جنارام گاؤں کے رہائشیوں کو بھی ڈر ہے کہ جورالا آرگینک فارمس اینڈ ایگرو انڈسٹریز لمیٹڈ کے ایتھنول پلانٹ سے علاقے میں آلودگی پھیلے گی۔ تاہم، 14 تنظیموں کی مخالفت کے باوجود، پلانٹ کی تعمیر اس سال کے اوائل میں شروع کر دی گئی تھی۔