تمل ناڈو: عوام تعاون کریں گے تو لاک ڈاؤن میں مزید راحت دی جائے گی، پلانی سوامی

چنئی: تمل ناڈو کے وزیراعلی ای کے پلانی سوامی نے بدھ کو کہا کہ اگر ریاست کے عوام اپنا پورا تعاون دیں گے تو حکومت لاک ڈاؤن میں اور زیادہ راحت دے سکتی ہے اور عالمی وبا کورونا وائرس ’کوویڈ -19‘ کو پھیلنے سے روکنا ریاست کے عوام کے ہاتھ میں ہے۔

پلانی سوامی نے یہاں ریاستی سکریٹریٹ سے ویڈیو کانفرنسنگ کے ذریعہ ضلع کلیکٹروں کے ساتھ کوویڈ -19 کے حالات کا جائزہ لیتے ہوئے کہا کہ حکومت کی جانب سے اعلان کردہ ہدایات پر عمل کرتے ہوئے اس وبا کو پھیلنے سے روکنا اب صرف ریاست کے عوام کے ہاتھ میں ہے۔ انہوں نے کہا، ’’اگر لوگ اپنا پورا تعاون دیتے ہیں تو لاک ڈاؤن میں اور زیادہ راحت کا اعلان کیا جائے گا اور ریاست میں عام معمولات زندگی بحال کرنے کےلئے قدم اٹھائے جائیں گے۔‘‘

وزیراعلی نے کہاکہ تمل ناڈو میں کوویڈ 19 سے شرح اموات ملک کی دیگر ریاستوں سے شرح اموات بہت کم یعنی 0.67 فیصد ہے۔ ریاست میں ابھی تک کُل 8718 کورونا پازیٹو معاملے ہیں اور کورونا انفیکشن سے مرنے والوں کی تعداد 61 ہے۔ انہوں نے کہا کہ ماہرین کے مطابق اس وائرس کے بڑھنے کے بعد اس کی شدت میں کمی آئے گی۔

پلانی سوامی نے کہا کہ ٹیسٹ کی تعداد زیادہ ہونے کی وجہ سے کورونا پازیٹو معاملوں میں تیزی آئی ہے۔ریاست میں ملک کے دیگر ریاستوں کے مقابلے ٹیسٹ شرح سب سے زیادہ ہے۔ خصوصاً چنئی میں کورونا معاملوں میں لوگوں کے خوف کو دور کیا جا رہا ہے اور پچھلے کچھ دنوں کے دوران 500 سے زیادہ معاملے درج کیے گئے ہیں۔