کسانوں کی رہائی کو لے کر ہوئی بات چیت بے سود، ٹکیت نے کہا مظاہرہ جاری رہے گا

ہریانہ میں دو کسانوں کی رہائی کو لے کر کسان رہنماؤں کی انتظامیہ سے ہوئی بات چیت بے نتیجہ رہی۔واضح رہے ان کسانوں کو ہریانہ پولیس نے جے جے پی رکن اسمبلی دیویندر ببلی کے ساتھ ہوئے تنازعہ کے بعد حراست میں لیا گیا تھا۔ ان کسانوں کو حراست میں لینے کے بعد ہفتہ کو فتح آباد ضلع واقع ٹوہانہ صدر پولیس تھانے کے سامنے بڑی تعداد میں کسان دھرنے پر بیٹھ گئے تھے۔

اس بات چیت کے بے سود ختم ہونے کے بعد کسان رہنما راکیش ٹکیت نے کہا ہے کہ جب تک کسانوں کو نہیں رہا کیا جائے گا جب تک یہ مظاہرہ جاری رہے گا، دوسری جانب انتظامیہ بھی ان کسانوں کو چھوڑنے کے لئے تیار نہیں ہے۔

واضح رہے کسانوں کا مطالبہ ہے کہ رکن اسمبلی دیویندر ببلی کے خلاف بھی کسانوں کے ساتھ بدسلوکی کرنے کے لئے کیس درج کیا جانا چاہیے۔ واضح رہے بعد میں دیویندر ببلی نے کسانوں کے خلاف غیر مناسب الفاظ استعمال کرنے کے لئے افسوس کا اظہار بھی کیا تھا۔ ببلی نے سوشل میڈیا پر ایک ویڈیو کلپ پوسٹ کی تھی جس میں انہوں نے ان لوگوں کو معاف کرنے کی بات کہی تھی جنہوں نے یکم جون کو ان کے ساتھ بدسلوکی کی تھی۔

دیویندر ببلی نے کہا تھا کہ ’’میں نے کچھ الفاظ کہے جو مناسب نہیں تھے میں عوامی نمائندہ ہوں اس لئے میں ان سبھی الفاظ کو واپس لیتا ہوں اور ان کے استعمال کے لئے افسوس کا اظہار کرتا ہوں۔‘‘ واضح رہے کسانوں نے جن نائک جنتا پارٹی یعنی جے جے پی کے رکن اسمبلی کے خلاف کسانوں کے گروپ نے مظاہرہ کیا تھا اور ان کے خلاف نعرے بازی کے ساتھ کالے جھنڈے بھی دکھائے تھے۔ ببلی کا الزام ہے کہ کچھ کسانون نے ان کے ساتھ بدسلوکی کی تھی۔