آئی ٹی آئی سے تربیت حاصل کرنے والے ہنر مند طلبہ مستقبل کی عبارت لکھیں گے: سسودیا

نئی دہلی: دہلی کے نائب وزیر اعلیٰ اور وزیر تعلیم منیش سسودیا نے کہا کہ انڈسٹریل ٹریننگ انسٹی ٹیوٹ (آئی ٹی آئی) جیسے تربیتی اداروں سے نکلنے والے ہونہار طلباء مستقبل کی نئی عبارت لکھیں گے۔ جمعرات کو یہاں آئی ٹی آئی، کھچڑی پور میں طلباء کے ساتھ بات چیت کے بعد سسودیا نے کہا کہ تربیت حاصل کرنے کے بعد آئی ٹی آئی جیسے اداروں سے نکلنے والے ہونہار طلباء مستقبل کی نئی کہانی لکھیں گے۔

انہوں نے کہا کہ ہمارا ملک اسی وقت ترقی کرے گا جب ملک کے ہر نوجوان کے پاس ہنر ہو گا، اس لیے ڈگری حاصل کرنے کے ساتھ ساتھ نوجوانوں کو ہنر مند بننا ہوگا۔ بات چیت کے دوران طلباء نے بتایا کہ آئی ٹی آئی کے پروفیشنل کورسز انہیں گریجویشن کے مقابلے میں زیادہ اعتماد دے رہے ہیں اور اب وہ خوفزدہ نہیں ہیں کہ کورس کے بعد انہیں ملازمت کے لیے بھٹکنا پڑے گا۔

نائب وزیراعلی نے کہا کہ آج پوری دنیا میں پروفیشنل کورسز پر توجہ دی جارہی ہے۔ ہندوستان کے ساتھ ساتھ بہت سے ترقی پذیر ممالک میں بھی بچوں کے ذہنوں میں یہ بات ڈالی جاتی ہے کہ اگر انہوں نے گریجویشن نہیں کی، تو کچھ نہیں کیا۔ اس کے برعکس ترقی یافتہ ممالک میں ٹکنیکل ایجوکیشن پر توجہ دی جاتی ہے۔ انہوں نے کہا کہ آج جب آٹھویں جماعت کی اہلیت کے لیے نوکری نکلتی ہے تو ہزاروں گریجویٹ بچے اس نوکری کے حصول کے لیے قطار میں کھڑے ہوتے ہیں۔ ایسی حالت میں اس بیچلر ڈگری کا کیا فائدہ جو آپ کو نوکری نہیں دلا سکے؟

انہوں نے کہا کہ اب دنیا کے کئی ممالک میں یہ ذہنیت بدلنی شروع ہو گئی ہے اور وہ تعلیم کے حوالے سے اپنے روایتی عقائد سے ہٹ کر ٹکنیکل ایجوکشن پر توجہ دینے لگے ہیں۔ ہندوستان میں بھی ہمیں اس سوچ کے ساتھ آگے بڑھنے کی ضرورت ہے۔

سسودیا نے آئی ٹی آئی کے طلباء سے اپیل کی ہے کہ ایک ایسے معاشرے میں جہاں یہ مانا جاتا ہے کہ اگر گریجویشن نہیں ہے تو بچے کی تعلیم میں بہت بڑی کمی رہ گئی ہے۔ معاشرے میں ویسے تو ہمیں بچوں کو پیشہ ورانہ نصاب کی طرف موڑنا ہے، پھر اپنے آئی ٹی آئی کے بچوں کو اپنے اسکولوں کے بچوں کو ترغیب دینا ہے۔ انہوں نے کہا کہ جلد ہی اس کے لیے ایک پروگرام تیار کیا جائے گا، جس میں آئی ٹی آئی کے بچوں کی اسکولوں میں آئی ٹی آئی کے لئے ممکنہ بچوں سے بات چیت کرائی جائے گی اور انہیں پروفیشنل کورسز کے لیے ترغیب دی جائے گی۔