طلاق ثلاثہ بل راجیہ سبھا میں پیش، اپوزیشن کا ہنگامہ

آل انڈیا مسلم پرسنل لا بورڈ نے ان تمام سیاسی جماعتوں کا شکریہ ادا کیا جنہوں نے راجیہ سبھا میں پرزور طریقہ سے تین طلاق مخالف بل پر اظہار خیال کرتے ہوئے بل کی خامیوں کو دور کرنے کے لئے اسے سلیکٹ کمیٹی میں بھیجنے کا مطالبہ کیا۔
بورڈ کے مولانا فضل الرحیم مجددی نے کہا کہ بل کی موجودہ شکل کی بنیاد پر قانون سازی کی جاتی ہے تو اس سے مسلم خواتین کی تکلیفیں بہت بڑھ جائیں گی اور دستور ہند کے ساتھ ساتھ سپریم کورٹ کے متعلقہ فیصلے کی بھی خلاف ورزی ہوگی۔

کانگریس کے سنیئر رہنما کپل سبل نے کہا ’’ارون جیٹلی نے سپریم کورٹ کے فیصلہ کا ذکرکیاہے۔ میں آل انڈیا مسلم پرسنل لاء بورڈ کی طرف سے معاملہ کا وکیل تھا اس لئے کہنا چاہوں گا کہ ارون جیٹلی فیصلہ کو غلط طریقہ سے پیش کر رہے ہیں۔

طلاق ثلاثہ بل راجیہ سبھا میں پیش ہونے کے بعد کانگریس کی طرف سے کیے گئے اعتراضات پر بولتے ہوئے ارون جیٹلی نے کہا کہ پورا ملک دیکھ رہا ہے کہ آپ نے (کانگریس نے) لوک سبھا میں بل کی حمایت کی ہے اور اب آپ بل کو منظور کرانے میں رخنہ ڈال رہے ہیں۔

وزیر خزانہ ارون جیٹلی نے آنند شرما کے نوٹس کے جواب میں کہا کہ ایوان اس نوٹس کو دیکھ کر حیرت میں ہے۔ انہوں نے کہا کہ ایسی کسی تجویز کو ایوان کے سامنے کم از کم 24 گھنٹے قبل بھیجا جانا چاہئے۔

کانگریس کے سینئر رہنما آنند شرما نے راجیہ سبھا میں نوٹس پیش کرتے ہوئے مطالبہ کیا کہ طلاق ثلاثہ بل ترمیمات کے لئے راجیہ سبھا کی سلیکٹ کمیٹی کے پاس غوروخوض کے لئے بھیجا جانا چاہئے۔ انہوں نے کمیٹی کے ممبران کے ناموں کو بھی پیش کیا۔

حکومت کی طرف سے وزیر قانون روی شنکر پرساد نے طلاق ثلاثہ بل راجیہ سبھا میں پیش کیا۔ بل کو پیش کرتے ہوئے روی شنکر پرساد نے کہا کہ بل لوک سبھا سے منظور ہو چکا ہے اس کے باوجود اب بھی ایک ہی نشست میں طلاق ثلاثہ دینے کا چلن بند نہیں ہوا ہے۔ انہوں نے مرادآباد کے ایک واقعہ کا ذکر کرتے ہوئے کہا کہ شوہر نے جہیز کا مطالبہ کرتے ہوئے اہلیہ کو ایک ہی نشست میں تین طلاق بول دیا ہے۔

طلاق ثلاثہ سے متعلق بل راجیہ سبھا میں پیش کر دیا گیا ہے۔ لوک سبھا میں بی جے پی کی اکثریت ہونے کی وجہ سے بی جے پی کو وہاں کوئی دشواری نہیں ہوئی اور بل صوتی ووٹ سے پاس ہو گیا لیکن راجیہ سبھا میں صورتحال تھوڑی مختلف ہے یہاں پر اس بل کو منظور کرانے کے لئے دیگر پارٹیوں کی مدد درکار ہے۔