تبلیغی جماعت کے سربراہ مولانا سعد جلد کرائیں گے کورونا انفیکشن کی جانچ

نئی دہلی: تبلیغی جماعت کے سربراہ مولانا محمد سعد کاندھلوی كوارنٹين کی مدت پوری ہونے کے بعد کورونا وائرس یعنی كووڈ-19 انفیکشن کی جانچ کرائیں گے۔ مولانا سعد کے وکیل فضیل احمد ایوبی نے آج یو این آئی سے بات چیت میں کہا کہ نظام الدین مرکز میں تبلیغی جماعت معاملے کی جانچ کرنے والی دہلی پولس کی کرائم برانچ کی جانب سے کورونا انفیکشن کی جانچ کرائے جانے کا مشورہ دیا گیا ہے۔ جانچ کرنے والی ٹیم کے مشورہ پر مولانا سعد کا جلد ہی کورونا وائرس کا ٹیسٹ کروایا جائے گا اور رپورٹ آنے کے بعد اس سلسلے میں بتایا جائے گا۔

فضیل احمد ایوبی نے کہا کہ مولانا سعد کے خلاف میڈیا میں طرح طرح کی بے بنیاد باتیں پھیلا کر انہیں بدنام کرنے کی کوشش کی جا رہی ہے جبکہ مولانا کی طرف سے جانچ سے بھاگنے یا خود کو اس سے الگ رکھے جانے کا باقاعدہ طورپر کبھی کوئی بیان نہیں دیا گیا ہے۔ انہوں نے کہا کہ پولس نے تبلیغی جماعت کے خلاف ایف آئی آر درج کی ہے اور اس کی جانچ وہ کر رہی ہے۔ لہٰذا جانچ کے درمیان کسی طرح کی افواہ اور بدنام کرنے والی خبریں جاری کرنا کسی بھی طرح سے مناسب نہیں ہے۔ پولس کی جانب سے جن سوالوں کے جواب مانگے گئے ہیں، وہ سب ان کو دستیاب کرائے گئے ہیں اور آگے بھی جانچ میں جس قسم کے تعاون کی ضرورت ہو گی اسے پورا کیا جائے گا۔