سوامی اگنیویش پر حملہ... کیا یہی ہے واجپئی کو سچی خراج عقیدت!

سوامی اگنیویش پر آج ایک بار پھر اس وقت تنگ ذہن افراد نے حملہ کر دیا جب وہ سابق وزیر اعظم اٹل بہاری واجپئی کو خراج عقیدت پیش کرنے کے لیے دین دیال اپادھیائے مارگ پہنچے تھے۔ سوامی اگنیویش پر اس حملہ کا ایک ویڈیو سوشل میڈیا پر شیئر کیا گیا ہے جس میں وہ اپنی جان بچا کر بھاگتے ہوئے نظر آ رہے ہیں۔ ان کے پیچھے لوگوں کی بھیڑ نعرہ لگاتے ہوئے دوڑ رہی ہے اور ساتھ ہی ایک خاتون اپنے ہاتھوں میں چپل لیے ہوئے سوامی اگنیویش کو برا بھلا کہہ رہی ہے۔ ویڈیو میں وہ خاتون سوامی اگنیویش کی پیٹھ پر چپل مارتے ہوئے بھی صاف نظر آ رہی ہے۔ حیرانی کی بات یہ ہے کہ جب سابق وزیر اعظم اٹل بہاری واجپئی کو خراج عقیدت پیش کرنے والوں کی بھیڑ جمع ہے اور سبھی کو یہ موقع فراہم کیا جا رہا ہے تو پھر سوامی اگنیویش جیسے معروف سماجی کارکن کو ایسا کرنے سے روک دیا گیا جو آر ایس ایس اور بی جے پی میں موجود کند ذہن لوگوں کا اصلی چہرہ سامنے لاتا ہے۔ اپنی جان بچانے کی خاطر سوامی اگنیویش نے اٹل بہاری واجپئی کو خراج عقیدت بھی پیش نہیں کیا۔

دراصل سابق وزیر اعظم اٹل بہاری واجپئی کا انتقال 16 اکتوبر کی شام ہوا اور آج ان کا جسد خاکی آخری دیدار کے لیے دین دیال اپادھیائے مارگ واقع بی جے پی صدر دفتر میں رکھا گیا ہے۔ سوامی اگنیویش یہیں خراج عقیدت پیش کرنے پہنچے تھے لیکن جب کچھ شر پسند عناصر نے انھیں وہاں دیکھا تو مشتعل ہو گئے اور ان پر اس طرح حملہ کیا کہ وہ جان بچا کر بھاگنے کے لیے مجبور ہوئے۔ یہاں سوال یہ پیدا ہوتا ہے کہ کیا سوامی اگنیویش پر حملہ کرنے والے لوگ ایسا کر کے اٹل بہاری واجپئی کواپنی طرف سے خراج عقیدت پیش کرنا چاہتے تھے؟ اور کیا یہ حملہ آور لوگ ایسے موقع پر بھی نفرت کی آگ اپنے سینے میں جلائے ہوئے ہیں۔ اٹل بہاری واجپئی جو مختلف طرح کے نظریات کو ایک پلیٹ فارم پر لانے کی صلاحیت رکھتے تھے اور ہمیشہ لوگوں کو جوڑنے کا کام کیا، یقینا ان کی روح کو اس واقعہ سے تکلیف ہی پہنچی ہوگی۔

واضح رہے کہ اس سے قبل جھارکھنڈ میں سوامی اگنیویش پر بھارتیہ جنتا یوا مورچہ نے حملہ کیا تھا۔ ایک مہینے قبل جب وہ جھارکھنڈ کے پاکوڑ میں پہاڑیا برادری سے جڑے ایک تقریب میں شامل ہونے گئے تھے تو ان پر قاتلانہ حملہ کیا گیا تھا جس کے بعد کافی ہنگامہ مچا تھا۔ سوامی اگنیویش نے تو یہاں تک کہا تھا کہ حملہ ریاستی حکومت کے ذریعہ منصوبہ بند تھا۔ اس الزام کے بعد بھارتیہ جنتا یوا مورچہ نے کہا تھا کہ انھوں نے اگنیویش کی مخالفت ضرور کی تھی لیکن حملہ کرنے والے لوگ ان کے کارکنان نہیں تھے۔