آگرہ ایئرفورس اسٹیشن میں اگنی ویر کی مشتبہ حالت میں موت، کورٹ آف انکوائری کا حکم جاری

اتر پردیش کے آگرہ واقع ایئرفورس اسٹیشن میں ایک اگنی ویر کی موت سے متعلق خبریں سامنے آ رہی ہیں۔ میڈیا رپورٹس کے مطابق یہ موت گزشتہ منگل کے روز ہوئی اور وجہ سے متعلق جانکاری ابھی تک سامنے نہیں آئی ہے۔ اس اگنی ویر کا نام شریکانت چودھری بتایا جا رہا ہے جس کا جسد خاکی اس کے آبائی گاؤں بلیا لایا گیا ہے۔

شریکانت چودھری کی مشتبہ حالت میں ہوئی موت کی وجہ کا پتہ لگانے کے لیے کورٹ آف انکوائری کا حکم جاری کر دیا گیا ہے۔ بتایا جا رہا ہے کہ 6 ماہ پہلے ہی اگنی ویر شریکانت کی پوسٹنگ آگرہ کے اجیت نگر واقع ایئرفورس اسٹیشن پر ہوئی تھی۔ اتر پردیش کے بلیا باشندہ شریکانت 2022 میں اگنی ویر منصوبہ کے تحت فوج میں داخل ہوا تھا۔ اسے 6 مہینے قبل ہی آگرہ بھیجا گیا تھا۔ گزشتہ ماہ کی 3 تاریخ کو شریکانت چھٹی پر گھر آیا تھا۔ اس کے بعد وہ 13 جون کو واپس چلا گیا تھا۔ منگل کی شب تقریباً 1 بجے شریکانت کی موت ہو گئی۔

بتایا جاتا ہے کہ پولیس کو شریکانت کی موت سے متعلق جانکاری بدھ کی صبح تقریباً 7 بجے دی گئی۔ بعد ازاں جمعرات کو شریکانت کے اہل خانہ کو اس موت کی جانکاری دی گئی۔ اب شریکانت کی لاش کو بصد احترام ان کے اہل خانہ تک پہنچایا گیا۔ شریکانت کے غمگین رشتہ داروں نے نم آنکھوں کے ساتھ اس کی آخری رسومات ادا کی۔