'عدالت کے ریمارکس سے خطرہ بڑھ گیا'، سپریم کورٹ میں نوپور کی نئی عرضی،آج ہوگی سماعت

سپریم کورٹ آج بی جے پی کی معطل رہنما نوپور شرما کی درخواست پر سماعت کرے گی، جس پر پیغمبر اسلام کے بارے میں متنازعہ تبصرہ کرنے کا الزام ہے۔ جسٹس سوریہ کانت اور جسٹس جمشید پارڈی والا کی بنچ اس درخواست کی سماعت کرے گی۔ اس سے پہلے یکم جولائی کو نوپور کی پچھلی عرضی اسی بنچ میں سماعت کے لیے لی گئی تھی۔ تب بنچ نے سخت تبصرہ کرتے ہوئے درخواست پر سماعت کرنے سے انکار کر دیا تھا۔ نئی درخواست میں نوپور نے اپنی گرفتاری پر روک لگانے اور ان کے خلاف درج تمام ایف آئی آر دہلی منتقل کرنے کا مطالبہ کیا ہے۔

نوپور شرما کیس کی سماعت کے لیے جسٹس سوریہ کانت اور جسٹس پارڈی والا کی خصوصی بنچ تشکیل دی گئی ہے۔سماعت کے لیے پہلے ہی جاری کی گئی فہرست کے مطابق، دونوں جج منگل کو مختلف بنچوں کا حصہ ہیں۔ ایسے میں انہیں اس معاملے کو سننے کے لیے خاص طور پر پہلے سے طے شدہ کام مکمل کرنے کے بعد ایک ساتھ بیٹھنا پڑے گا۔ اس لیے اس درخواست کی سماعت دوپہر کے بعد ہی متوقع ہے۔

نوپور نے نئی درخواست میں کہا ہے کہ یکم جولائی کو سپریم کورٹ نے ان کی درخواست پر سماعت کرنے سے انکار کرتے ہوئے غیر متوقع طور پر سخت تبصرہ کیا تھا۔اب نوپور نے نئی عرضی دی ہے جس میں کہا ہے کہ یکم جولائی کو سپریم کورٹ نے ان کی درخواست پر سماعت کرنے سے انکار کرتے ہوئے غیر متوقع طور پر سخت تبصرہ کیا تھا جس سے ان کی جان کو خطرہ بڑھ گیا ہے۔ اس دن ججز نے کہا تھا کہ آپ (نوپور شرما) کی وجہ سے ملک کے حالات خراب ہوئے، آپ نے تاخیر سے معافی مانگی، وہ بھی اس شرط کے ساتھ کہ اگر کسی کے جذبات مجروح ہوئے ہیں تو بیان واپس لیتی ہوں، آپ کو قومی ٹی وی پر جا کر پورے ملک سے معافی مانگنی چاہیے۔

عدالت نے اس دن دہلی پولیس کو بھی آڑے ہاتھوں لیا تھا۔ انہوں نے پوچھا تھا، "دہلی میں درج ایف آئی آر میں کیا کارروائی کی گئی ہے؟ یہاں، ہوسکتا ہے کہ پولیس نے آپ (نوپور شرما)کے لیے سرخ قالین بچھا دیا ہو؟ آپ کو خصوصی درجہ مل رہا ہے۔ لیکن عدالت میں ایسا درجہ نہیں ملے گا۔‘‘