لاک ڈاؤن : فوج تعینات کرنے سے سپریم کورٹ کا انکار، سوشل ڈسٹینسنگ کے خلاف عرضی گزار پر جرمانہ 

سپریم کورٹ نے آج ملک میں لاک ڈاؤن پر سختی سے عمل کو یقینی بنانے کے لئے فوج کو بلانے والی درخواست کو مسترد کر دیا۔ جسٹس اشوک بھوشن، جسٹس سنجے کشن کول اور جسٹس بی آر گوئي کی بینچ نے ممبئی کےكملاكر شینائے کی عرضی ویڈیو کانفرنسنگ کے ذریعے مختصر سماعت کے دوران مسترد کی۔ جسٹس بھوشن نے درخواست گزار سے کہا، "یہ حکومت پر چھوڑ دیجئے کہ فوج کہاں بھیجنی ہے اور کہاں نہیں۔

دوسری جانب سپریم کورٹ نے کورونا وائرس وبا کے دوران’سوشل ڈسٹنسنگ‘کےبجائے فیزیکل ڈسٹنسنگ جیسے لفظ کے استعمال کو چیلنج کرنے والی درخواست کی سماعت سے جمعہ کو انکارکردیا اور شدید ناراضگی کا اظہار کرتے ہوئے درخوست گزارپر دس ہزارروپے کا جرمانہ بھی عائد کیا۔

جسٹس اشوک بھوشن،سنجے کشن کول اور جسٹس بی آر گوئی کی بینچ نے شکیل قریشی کی عرضی خارج کردی۔عدالت نے درخواست گزار پر اس طرح کی عرضی دائر کرنے کے لئے دس ہزار روپے کا جرمانہ بھی عائد کیا۔

درخواست گزار شکیل قریشی کا کہنا تھا کہ سوشل ڈسٹنسنگ لفظ اقلیتوں کے ساتھ امتیازی سلوک کرنے والا ہے۔مسٹر قریشی کے وکیل ایس بی دیشمکھ نے دلیل دی کہ اتر پردیش اور کچھ ریاستیں سوشل ڈسٹنسنگ لفظ کا استعمال کررہی ہیں جس کا ہندی مطلب سماجی دوری ہوتا ہے۔ انہیں فیزیکل ڈسٹنسنگ یاجسمانی دوری جیسےا لفاظ کا استعمال کرنا چاہئے۔

جسٹس بھوشن نے ناراضگی کااظہار کرتے ہوئے کہا،’’ہم یہ درخواست خارج کرتے ہیں اور آپ پر10ہزار جرمانہ بھی عائد کرتے ہیں۔‘‘