سپریم کورٹ نے مودی حکومت کو غلطی سدھارنے کا موقع دیا: راہل گاندھی

مرکز کی مودی حکومت کو لگاتار اس کی غلط پالیسیوں کے سبب تنقید کا نشانہ بنانے والے کانگریس رکن پارلیمنٹ راہل گاندھی نے آج سپریم کورٹ کے ایک فیصلے کو سامنے رکھتے ہوئے ٹوئٹ کیا ہے۔ اس ٹوئٹ میں راہل گاندھی نے لکھا ہے کہ ’’سپریم کورٹ نے مودی حکومت کو غلطی سدھارنے کا موقع دیا ہے۔ کم از کم اب حکومت کو معاوضہ کی صحیح رقم طے کر کے متاثرین کو راحت دینی چاہیے۔ یہ درست سمت میں ایک اہم قدم ہے۔‘‘ اس ٹوئٹ کے ساتھ ہی ایک ہندی نیوز پورٹل پر شائع سپریم کورٹ کی ہدایت سے متعلق خبر کے عنوان کا اسکرین شاٹ بھی شیئر کیا ہے جس کا اردو ترجمہ ہے ’کورونا سے موت پر اہل خانہ کو ملے گا معاوضہ، سپریم کورٹ کا حکم- رقم طے کرے حکومت، 6 ہفتے میں گائیڈ لائن بنائے‘۔

دراصل عدالت عظمیٰ نے بدھ کے روز ایک سماعت کے دوران حکم دیا ہے کہ کورونا سے جن لوگوں کی موت ہوئی ہے ان کے اہل خانہ کو حکومت کی جانب سے معاوضہ دیا جائے گا۔ اس کے لیے سپریم کورٹ نے حکومت سے کہا ہے کہ وہ معاوضہ کی رقم طے کرے اور 6 ہفتے میں گائیڈ لائن بھی تیار کرے۔ اسی خبر کے تعلق سے راہل گاندھی کا رد عمل بذریعہ ٹوئٹ سامنے آیا ہے۔

اس سے قبل آج صبح راہل گاندھی نے لگاتار بڑھ رہی ڈیزل-پٹرول کی قیمتوں کو لے کر مرکزی حکومت کو تنقید کا نشانہ بنایا تھا۔ اس سلسلے میں انھوں نے ٹوئٹ کرتے ہوئے لکھا تھا کہ ’’پبلک ٹرانسپورٹ کے لیے طویل-پریشان کن لائنوں کی وجہ صرف کووڈ پابندی نہیں ہے۔ اصل وجہ جاننے کے لیے اپنے شہر میں پٹرول-ڈیزل کی قیمت دیکھیں۔‘‘