گجرات فسادات میں مودی کو کلین چٹ کے خلاف عرضی پر سماعت 4 ہفتہ بعد

سپریم کورٹ نے 15 جنوری کو واضح کر دیا ہے کہ 2002 کے گودھرا فسادات سے جڑے معاملوں میں گجرات کے اس وقت کے وزیر اعلیٰ نریندر مودی کو کلین چٹ کے خلاف داخل عرضی پر چار ہفتہ بعد سماعت کی جائے گی۔ اس سلسلے میں ایس آئی ٹی کی جانب سے نریندر مودی کو کلین چٹ دے دی گئی تھی۔ اسی کلین چٹ کو ذکیہ جعفری نے ایک عرضی داخل کر چیلنج کیا ہے۔

دراصل گودھرا فساد کے دوران کئی اندوہناک واقعات پیش آئے تھے جن میں سے ایک کا تعلق ذکیہ جعفری کے شوہر اور ہلاک سابق رکن پارلیمنٹ احسان جعفری سے ہے۔ ذکیہ جعفری نے اس معاملے میں گجرات ہائی کورٹ کے 5 اکتوبر 2017 کے حکم کو چیلنج پیش کیا ہے۔ اس حکم میں ایس آئی ٹی کے فیصلے کے خلاف داخل ان کی عرضی کو منسوخ کر دیا گیا تھا۔

یہ معاملہ سماعت کے لیے جسٹس اے ایم کھانولکر اور جسٹس اجے رستوگی کی بنچ کے سامنے آیا تھا۔ عرضی دہندہ کی طرف سے پیش ہوئے وکیل نے کہا کہ انھوں نے سماعت ملتوی کرنے کی گزارش کی ہے۔ بنچ نے اس تعلق سے کہا کہ ’’آپ چار ہفتہ مانگ رہے ہیں اور ہم آپ کو چار ہفتہ دیتے ہیں۔ معاملے کو چار ہفتہ بعد لسٹیڈ کریں۔‘‘