سپریم کورٹ نےبینکوں اور موبائل کمپنیوں کو پھٹکارلگائی 

نئی دہلی۔ بینک کھاتوں اور موبائل نمبر کو آدھار سے لنک کرنے کے عمل کی موزونیت سے متعلق 4 عرضیوں پر سماعت کرتے ہوئے سپریم کورٹ نے حکومت سے اپنی رائے پیش کرنے کو کہا ہے۔

کورٹ نے کوئی عبوری فیصلہ نہ سناتے ہوئے کہا کہ نومبر کے آخر میں آدھار سے متعلق معاملات کی سماعت کے دوران اس کا فیصلہ ہوگا اور مرکزی حکومت نے پہلے ہی لنک کرنے کی مدت کو بڑھاکر 31 دسمبر کر دیا ہے۔

جسٹس اے کے سیکری اور جسٹس اشوک بھوشن کی بنچ نے یہ بھی کہا کہ ٹیلی کام کمپنیاں اور بینک ،صارفین کو جو پیغامات بھیج رہے ہیں ان میں صاف صاف بتائیں کہ لنک کرنے کی آخری تاریخ کیا ہے۔

عرضی گزاروں کا کہنا تھا کہ موبائل اور بینک کھاتوں کو آدھار سے زبردستی لنک کرانے کی کوشش غیر قانونی اور آئین کے مخالف ہے۔ اس کے جواب میں بنچ کی رائے تھی کہ عرضی گزار اس سوال کو آدھار سے متعلق تمام عرضیوں کی سماعت کر رہی بنچ کے سامنے رکھ سکتے ہیں۔