شیوراج کے سرکاری اسپتال میں مریضوں کے بستروں پر آوارہ کتے نظر آ رہے ہیں!

شیوراج حکومت میں محکمہ صحت کو لے کر کئی طرح کے سوالات کئے جا رہے ہیں۔ اسی درمیان ایک ویڈیو سامنے آیا ہے۔ معاملہ مدھیہ پردیش کے رتلام ضلع کا ہے۔ جہاں ایک سرکاری اسپتال کا ویڈیو منظر عام پر آیا ہے۔ وائرل ویڈیو میں ایک آوارہ کتا اسپتال میں داخل ہوا، یہی نہیں کہ وہ اندر داخل ہوا بلکہ اسے مریضوں کے بستر پر سوتا ہوا بھی دیکھا گیا۔ ویڈیو سوشل میڈیا پر کافی وائرل ہو رہی ہے۔

کانگریس نے اس ویڈیو کو لے کر بی جے پی حکومت کو نشانہ بنایا ہے۔ کانگریس نے اس ویڈیو کو لے کر بی جے پی حکومت کو ریاست میں خراب طبی نظام کے لئے ذمہ دار ٹھہرایا ہے۔ مدھیہ پردیش کانگریس کے ترجمان نریندر سلوجا نے ٹوئٹر پر اس ویڈیو کو شیئر کیا ہے۔

نریندر سلوجا نے لکھا ہے کہ بی جے پی حکومت میں ریاست میں کتوں کو اچھی نیند آرہی ہے، جب کہ اسپتالوں میں مریضوں کو بستر نہیں مل رہے ہیں۔ سلوجا نے دعویٰ کیا کہ یہ ویڈیو مدھیہ پردیش کے آلوٹ میں واقع ایک سرکاری اسپتال کا ہے۔

واضح رہے قومی آواز اس ویڈیو کی کوئی تصدیق نہیں کرتا، لیکن یہ ویڈیو وائرل ہو رہی ہے۔