ریاستی حکومت بنگال میں تشدد پر کارروائی کرے: مودی

مغربی بنگال میں حالیہ تشدد پر غم اور تعزیت کا اظہار کرتے ہوئے وزیر اعظم نریندر مودی نے ریاستی حکومت سے بیر بھوم تشدد میں ملوث افراد کو سزا دینے کی اپیل کی ہے۔وزیراعظم نے کہا کہ مرکزی حکومت ایسے مجرموں کو قانون کے حوالے کرنے میں ریاستی حکومت کی ہر ممکن مدد کرنے کے لیے تیار ہے، انہوں نے کہا کہ ایسے مجرموں کی حوصلہ افزائی کرنے والوں کو بھی معاف نہیں کیا جانا چاہیے۔

وزیر اعظم یوم شہداء کے موقع پر ویڈیو کانفرنسنگ کے ذریعے کولکتہ کے وکٹوریہ میموریل ہال میں بپلوبی بھارت گیلری کا افتتاح کر رہے تھے۔مسٹر مودی نے کہاکہ میں مغربی بنگال کے بیر بھوم میں ہونے والے پرتشدد واقعہ پر اپنی تعزیت کا اظہار کرتا ہوں۔ مجھے امید ہے کہ ریاستی حکومت بنگال کی عظیم سرزمین پر ایسے گھناؤنے گناہ کرنے والوں کو ضرور سزا دے گی۔انہوں نے کہاکہ مرکزی حکومت کی طرف سے میں ریاست کو یقین دلاتا ہوں کہ مجرموں کو جلد سے جلد سزا دلانے کے لیے جو بھی مدد چاہئے ہوگی، فراہم کی جائے گی۔

وزیر اعظم نے ریاست کے لوگوں سے کہا کہ وہ ایسے گھناؤنے جرائم کے مرتکب افراد اور ان کی حوصلہ افزائی کرنے والوں کو کبھی معاف نہ کریں۔انہوں نے کہاکہ وہ بنگال کے لوگوں سے بھی درخواست کرتے ہیں کہ وہ ایسے واقعات کو انجام دینے والوں اور ایسے مجرموں کی حوصلہ افزائی کرنے والوں کو کبھی معاف نہ کریں۔

منگل کو مغربی بنگال کے بیر بھوم ضلع کے بوگتوئی گاؤں میں نامعلوم شرپسندوں نے کئی گھروں کو نذر آتش کر کے کم از کم آٹھ افراد کو ہلاک کر دیا۔اس واقعے کو 'خوفناک قرار دیتے ہوئے ریاستی گورنر جگدیپ دھنکھڑنے کہا کہ بنگال 'تشدد کلچر اور انارکی کی گرفت میں ہے۔ انہوں نے اس سلسلے میں وزیر اعلیٰ ممتا بنرجی کو خط لکھا ہے۔