لداخ کے ریاستی درجہ کے مطالبے پر احتجاج، سونم وانگ چک اور دیگر افراد رہا ہونے کے بعد دوبارہ زیرِ حراست

نئی دہلی: دہلی پولیس نے ماہرِ ماحولیات اور لداخ کے مشہور سماجی کارکن سونم وان گچک کو لداخ کے 150 رہائشیوں کے ساتھ ایک مرتبہ پھر حراست میں لے لیا۔ پولیس نے یہ کارروائی اس وقت کی جب وانگ چک اور ان کے ساتھیوں نے قومی راجدھانی دہلی کے مرکزی علاقے کی طرف مارچ کرنے پر اصرار کیا۔ انہیں منگل کی رات مختصر طور پر رہا کیا گیا تھا لیکن دہلی پولیس نے انہیں دوبارہ حراست میں لیا کیونکہ وہ اپنے احتجاج کو جاری رکھنا چاہتے تھے۔

وانگ چک کو بوانا تھانے میں رکھا گیا ہے، جبکہ دیگر مظاہرین کو مختلف تھانوں میں منتقل کیا گیا، جن میں نریلا صنعتی علاقہ، علی پور اور کنجھاولا شامل ہیں۔ اس سے قبل پیر کی شب، دہلی پولیس نے سنگھو بارڈر پر مظاہرین کو دفعہ 144 کی خلاف ورزی پر حراست میں لیا تھا۔ وانگ چک اور ان کے ساتھی 'دہلی چلو پد یاترا' کی قیادت کر رہے تھے، جو لداخ کو ریاستی درجہ دینے اور آئین کی چھٹی شق میں اس کے اندراج کے مطالبات کے ساتھ شروع کی گئی تھی۔

رپورٹ کے مطابق احتجاج کی قیادت 'لیہ اپیکس باڈی' اور 'کرگل ڈیموکریٹک الائنز' نے کی، جو لداخ کے حقوق کے لیے پچھلے 4 سالوں سے مسلسل کوششیں کر رہے ہیں۔ مظاہرہ کرنے والے ایک شخص نے منگل کے روز بتایا کہ حراست میں لیے گئے تمام افراد غیر معینہ مدت تک بھوک ہڑتال پر ہیں۔ ان کا کہنا ہے کہ اگر دہلی پولیس انہیں بدھ کو گاندھی اسمریتی جانے کی اجازت نہیں دیتی، تو وہ رہا ہونے کے بعد بھی تھانوں میں بیٹھے رہیں گے۔

وانگ چک اور لداخ کے رہائشیوں کا یہ احتجاج ریاستی درجہ اور آئینی حقوق کے مطالبے پر مبنی ہے اور ان کا موقف ہے کہ لداخ کو آئین ہند کی چھٹی شق میں شامل کیا جائے تاکہ مقامی لوگوں کے حقوق اور ثقافت کا تحفظ کیا جا سکے۔ مظاہرین کا عزم ہے کہ وہ اپنے مطالبات پر زور دیتے ہوئے غیر معینہ مدت تک بھوک ہڑتال جاری رکھیں گے۔