’’کچھ طاقتیں سیاسی مقاصد کے لیے جموں و کشمیر میں دوریاں بڑھانا چاہتی ہیں‘‘

جموں: نیشنل کانفرنس کے صوبائی صدر جموں دیویندر سنگھ رانا نے جموں اعلامیہ تشکیل دینے کی تجویز پیش کرتے ہوئے کہا ہے کہ اس اعلامیے کے تحت جموں اور کشمیر کے بیچ پیدا ہونے والی دوریوں کو پاٹنے کی کوشش کی جائے گی۔ انہوں نے کہا کہ کچھ طاقتیں اپنے سیاسی مقاصد کے حصول کے لئے جموں اور کشمیر کے درمیان دوریوں کو مزید بڑھانا چاہتے ہیں۔ ان کا کہنا تھا کہ جموں کے ساتھ ہونے والی کسی بھی نا انصافی کو برداشت نہیں کیا جائے گا بلکہ ہم جموں اور کشمیر کے لوگوں کویکساں حقوق دینے کے حق میں ہیں۔

موصوف نے ان باتوں کا اظہار یہاں ایک مقامی نیوز چینل کے ساتھ اپنے گفتگو کے دوران کیا۔ انہوں نے کہا کہ ’میں نے جموں اعلامیے کی تجویز پیش کی ہے، یہ کوئی سیاسی بات نہیں ہے بلکہ ہم چاہتے ہیں کہ اس اعلامیے کے تحت جموں اور کشمیر کے درمیان دوریوں اور جموں کے الگ الگ خطوں کے بیچ جو دوریاں ہیں ان کو پاٹا جائے اور لوگوں کے دلوں کو جوڑا جائے‘۔ ان کا کہنا تھا کہ کچھ طاقتیں ایسی ہیں جو اپنے سیاسی مقاصد کے حصول کے لئے جموں اور کشمیر کے بیچ دوریوں کو مزید بڑھانا چاہتے ہیں۔

موصوف صوبائی صدر نے کہا کہ جموں کے جملہ خطوں کو اپنے حقوق مل جانے چاہیے اور جموں کے لوگوں کے حقوق کے ساتھ ہونے والی کسی بھی نا انصافی کو برادشت نہیں کیا جائے گا۔ انہوں نے کہا کہ ہم چاہتے ہیں کہ جموں اعلامیہ کے تحت ایک ایسا روڈ میپ تیار کیا جائے جس میں ہر کسی کو اپنا حق ملے۔

دیویندر رانا نے کہا کہ جس طرح مجھے ڈوگرہ ہونے پر فخر ہونا چاہیے اسی طرح ایک کشمیری کو بھی کشمیری ہونے پر فخر ہونا چاہیے لیکن ہمیں دلوں کو جوڑ کر دوریوں کو پاٹنے کے لئے ایک ہونا چاہیے۔ انہوں نے کہا کہ ملک میں کچھ لوگ سمجھتے ہیں کہ جموں وکشمیر آج ہی بھارت کا حصہ بن گیا ہے انہیں یہ معلوم ہی نہیں ہے کہ جموں وکشمیر 1947 سے ہی بھارت کا حصہ ہے ان لوگوں کو یہ بات سمجھانے کی ضرورت ہے۔

موصوف نے کہا کہ جس طرح مہاتما گاندھی کو 1947 میں جموں و کشمیر میں ہی روشنی کی ایک کرن نظر آئی تھی، میں چاہتا ہوں کہ جموں اعلامیہ اس کرن کو ملک اور دنیا میں مزید روشن ہونے کا وسیلہ بنے۔ انہوں نے کہا کہ جموں وکشمیر کو ملک کا تاج بنانے کے لئے ہم سب کو مل کر کام کرنا چاہیے۔