مدھیہ پردیش میں اب تک 1500 کووں اور پرندوں کی موت

بھوپال: مدھیہ پردیش کے 41 اضلاع میں اب تک 1500 کووں اور جنگلی پرندوں کی موت واقع ہو چکی ہے۔ تشویش ناک بات یہ ہے کہ ریاست کے 18 اضلاع میں برڈ فلو کی تصدیق کی جا چکی ہے۔ بھوپال میں واقع قومی ہائی سیکورٹی بیماریوں کی تحقیق کی لیبارٹری کو مختلف اضلاع سے اب تک 334 نمونوں کو جانچ کے لئے بھیجا گیا ہے۔

مویشی پروری کے وزیر پریم سنگھ پٹیل نے کہا کہ حکومت ہند کی طرف سے جاری رہنما ہدایات کے مطابق ریاست میں برڈ فلو کی روک تھام کے لئے ہر ممکن کوشش کی جا رہی ہے۔ وزیر اعظم نریندر مودی کی طرف سے ویڈیو کانفرنس کے دوران دی گئی ہدایات کے مطابق ریاست کے آبی ذخائر، پرندوں کی پناہگاہوں، چڑیا گھروں وغیر پر نگاہ داشت رکھی جا رہی ہے۔ مرے ہوئے پرندوں کی اطلاع پر نمونوں کو جمع کر کے بھوپال لیب کو بھیجا جا رہا ہے۔

مدھیہ پردیش کے 18 اضلاع - اندور، مندسور، آگر، نیمچ، دیواس، اجین، کھنڈوا، کھرگون، گونا، شیوپوری، راجگڑھ، شاجا پور، ویدیشا، بھوپال، ہوشنگ آباد، اشوک نگر، دتیا اور بڑوانی میں کووں اور جنگلی پرندوں میں برڈ فلو کی تصدیق ہوئی ہے۔ ریاست کے 41 اضلاع میں تقریباً 1500 کووں اور جنگلی پرندوں کی موت ہو چکی ہے۔ بھوپال میں واقع قومی ہائی سیکورٹی بیماریوں کی تحقیق کی لیبارٹری کو مختلف اضلاع سے اب تک 334 نمونوں کو جانچ کے لئے بھیجا گیا ہے۔