دہلی فسادات: موہندر سنگھ نے مسلم مردوں کو پگڑی پہنا کر محفوظ مقام پر پہنچایا

دہلی میں 23 فروری سے لے کر 26 فروری تک ہونے والے دنگوں میں بڑی تعداد میں لوگ بے گھر ہو گئے ہیں اور وہ راحت کیمپوں میں رہنے کے لئے مجبور ہیں ایسے میں جہاں کئی تنظیمیں ان کی مدد کے لئے آگے آئی ہیں وہیں سکھ سماج کے لوگ ان بے گھر لوگوں کے لئے مسیحا بن کر سامنے آئے ہیں۔ اطلاعات کے مطابق تشدد کے دوران موہندر سنگھ خالصہ اور ان کے بیٹے نے تقریباً 60 افراد کی جان بچائی۔ سکھ سماج سے جڑے لوگ متاثرہ علاقہ میں مستقل لنگر جاری رکھے ہوئے ہیں۔

موہندر سنگھ 24 فروری کی شام کا ذکر کرتے ہوئے بتاتے ہیں کہ ’’جب پڑوس کی ایک مسجد میں لوگ توڑ پھوڑ کرنے پہنچے تو وہ اپنی دوکان پر بیٹھے ہوئے تھے۔ ان کی گلی میں دس سے زیادہ مسلم خاندان رہتے تھے اور کچھ لوگ مسجد میں بھی رہتے تھے۔ مجھے لگا کہ یہ لوگ کردم پوری میں محفوظ رہیں گے اور پھر میں نے ان کو اپنی گاڑی میں بٹھاکر کئی چکر لگائے اور ان کو محفوظ مقام پر پہنچا دیا۔‘‘ انہوں نے بتایا کہ دو گھنٹوں میں انہوں نے 60 لوگوں کو بچایا اور مردوں کی پہچان چھپانے کے لئے انہیں پگڑی پہنا دی تھی۔

علاقہ کے سابق رکن اسمبلی اور مفت ایمبو لینس فراہم کرنے والی این جی او کے مالک جتندر سنگھ شنٹی نے اے بی پی نیوز چینل کو بتایا ’’میں نے خود کم از کم 14 زخمیوں کو اسپتال پہنچایا۔‘‘ انہوں نے بتایا کہ 24 فروری کو ان کے پاس فون کال آئی کہ ایک رپورٹر کو گولی لگ گئی ہے۔ اس وقت کوئی ایمبولینس نہیں تھی اس لئے وہ خود گاڑی چلا کر وہاں پہنچے اور زخمی کو اسپتال لے کر گئے۔

واضح رہے اس علاقہ میں ہندو مسلم اور سکھ سماج کے لوگ برسوں سے ساتھ رہتے ہیں۔ علاقہ میں فساد متاثرین کی مدد کرنے کے لئے سکھ سماج کے لوگ سامنے آئے ہیں۔ محمد یوسف کا میڈیکل اسٹور تھا جو دنگائیوں نے پوری طرح جلا دیا تھا اب اس کی دبارہ مرمت کا کام سکھ سماج کے لوگ کرا رہے ہیں۔ یوسف نے اے بی پی کو بتایا کہ ’’دنگوں میں دوکان جلنے کے بعد وہ سب کچھ کھو بیٹھے تھے اور ان کے پاس کچھ نہیں بچا تھا پھر کچھ لوگوں نے ان کے بارے میں خالصہ گروپ کو جانکاری دی، اس گروپ نے میری مدد کی اور وہ بھی اس وقت جب میرے اپنے رشتہ داروں نے مجھے فون تک نہیں کیا۔‘‘

واضح رہے یہ خالصہ تنظیم دہرادون کی ہے اور اس کے ایک رکن اندر جیت سنگھ نے بتایا ’’جب تک یوسف اور ان جیسے کئی لوگوں کے حالات ٹھیک نہیں ہو جائیں گے تب تک وہ واپس نہیں جائیں گے۔‘‘ واضح رہے یوسف کا پورا خاندان زبردست ڈپریشن کا شکار تھا۔