سدھو موسیٰ والا قتل: لارنس گینگ کو ہتھیار مہیا کرنے والا دھرمن جوت حراست میں

نئی دہلی: سدھو موسی والا قتل کیس میں مطلوب اور بین الاقوامی اسلحہ مافیا دھرمن جوت سنگھ کاہلو کو پولیس نے امریکہ میں حراست میں لے لیا ہے۔ ملزم دھرمن جوت سنگھ کاہلو کو گولڈی برار اور لارنس بشنوئی کا کافی قریبی سمجھا جاتا ہے۔ الزام ہے کہ موسی والا قتل میں استعمال ہونے والا اسلحہ اس نے ہی گولڈی برار کے پاس پہنچایا تھا۔ ملزم دھرمن جوت سنگھ اے کے 47، زیگانہ اور جدید ترین ہتھیاروں کا سودا کرتا ہے۔

سیکورٹی ایجنسیوں کے ذرائع کے مطابق حکومت ہند جلد ہی ایف بی آئی سے رابطہ کرے گی، تاکہ اسلحہ مافیا کو بھارت لایا جا سکے۔ معلومات کے مطابق ملزم دھرمن جوت سنگھ کاہلو کو کیلیفورنیا سے حراست میں لے لیا گیا ہے۔ کاہلو کے خلاف لک آؤٹ سرکلر جاری کیا گیا تھا۔ دہلی پولیس اسپیشل سیل، پنجاب پولیس اور این آئی اے اس مطلوب کی تلاش میں تھے۔

ملزم دھرمن جوت سنگھ پنجاب کے امرتسر کا رہنے والا ہے اور جگو بھگوان پوریا کا خاص ہے۔ رپورٹ کے مطابق جگو نے ہی لارنس اور گولڈی اور دھرمن جوت کی فون پر بات کرائی تھی۔ کاہلو موہالی میں یو اے پی اے کیس میں بھی مطلوب ہے۔ ملزم لارنس اور بمبیہا دونوں گروہوں کو ہتھیار فراہم کرتا ہے۔ گینگسٹر سچن بشنوئی نے کاؤنٹر انٹیلی جنس یونٹ کے سامنے یہ بھی انکشاف کیا تھا کہ امریکہ میں بیٹھا یہ شخص لارنس بشنوئی گینگ کو ہتھیار فراہم کرتا ہے۔