لکھنؤ میں 25 مارچ کو ’شیعہ صوفی یکجہتی کانفرنس‘ کا انعقاد

’شیعہ صوفی یکجہتی کانفرنس‘ کا انعقاد شیعہ عالم دین کلب جواد کی طرف سے کیا جا رہا ہے۔ اس میں تمام مسلم تنظیموں کو مدعو کیا گیا ہے اور کانفرنس کچھوچھہ، مکن پور، دیوا شریف ، دہلی کی درگاہ نظام الدین اولیا اور درگاہ اجمیر شریف کے علاوہ صوفی مسلک سے وابستہ کئی درگاہوں اور خانقاہوں کے نمائندگان شرکت کریں گے۔

’فرسٹ پوسٹ ‘ کے مطابق کلب جواد کا کہنا ہے کہ ’’آج بادشاہوں کو اسلام کی علامت تصور کیا جا رہا ہے، جو کہ غلط ہے۔ یہ کہا جا رہا ہے کہ کسی نے روم جیت لیا، کسی نے ایران پر فتح حاصل کر لی ۔ اسلام کی علامت بادشاہیت نہیں بلکہ امام حؑسین اور خواجہ معین الدین چشتؒی ہونے چاہئیں جو امن کی بات کرتے ہیں۔‘‘

کلب جواد نے مزید کہا ’’ داعش اور طالبان کا نظریہ اسلام کا نظریہ نہیں ہے۔ مجوزہ جلسہ میں دہشت گردی کے خلاف مہم شروع کی جائے گی۔ ‘‘

مولانا کلب جواد کے مطابق شیعہ اور صوفی مسلک میں 90 فیصد مساوات ہے۔ صوفی مسلک کے پیروکار بھی شیعوں کی طرح امام حسینؑ کو مانتے ہیں اور محرم میں غم مناتے ہیں۔