کورونا سے 4.8 لاکھ نہیں، 47 لاکھ لوگوں کی جان گئی، مودی جھوٹ بولتے ہیں، سائنس نہیں! راہل گاندھی

نئی دہلی: کانگریس کے سابق صدر راہل گاندھی نے ملک میں کورونا وائرس سے ہونے والی اموات پر ایک بار پھر مودی حکومت کو ہدف تنقید بنایا ہے۔ ہندوستان میں کورونا کی وجہ سے ہونے والی اموات کے ڈبلیو ایچ او (عالمی ادارہ صحت) کے اعداد و شمار کو شیئر کرتے ہوئے راہل گاندھی نے کہا کہ مودی جھوٹ بولتے ہیں، سائنس نہیں!

راہل گاندھی نے ٹوئٹر پر لکھا، ’’کووڈ وبا کی وجہ سے 47 لاکھ ہندوستانی ہلاک ہوئے۔ 4.8 لاکھ نہیں جیسا کہ حکومت نے دعویٰ کیا ہے۔ مودی جھوٹ بولتے ہیں، سائنس جھوٹ نہیں بولتی! ان خاندانوں کا احترام کریں جنہوں نے اپنے پیاروں کو کھو دیا۔ مرنے والوں کے لواحقین کو 4-4 لاکھ روپے کا معاوضہ فراہم کیا جائے۔

خیال رہے کہ عالمی ادارہ صحت کی ایک نئی رپورٹ کے مطابق دنیا بھر میں کورونا وائرس کے نتیجے میں اندراج کردہ اموات سے 3 گنا زیادہ افراد ہلاک ہوئے ہیں۔ اسی رپورٹ میں کہا گیا ہے کہ اب تک جن اموات کو شمار نہیں کیا گیا ان میں سے تقریباً نصف کا تعلق ہندوستان سے ہے۔ عالمی ادارہ صحت کی رپورٹ کے مطابق ہندوستان میں کورونا کے سبب 47 لاکھ افراد کی جان چلی گئی۔

رپورٹ کے مطابق اموات کے اصل اعداد و شمار حکومت ہند کے بتائے ہوئے اعداد و شمار سے 10 گنا زیادہ ہیں۔ دوسری جانب حکومت ہند نے کورونا سے اموات پر دیے گئے عالمی ادارہ صحت کے اعداد و شمار کو مسترد کر دیا ہے۔ ہندوستان کے سرکاری اعداد و شمار کے مطابق کورونا کے سبب 4.8 لاکھ لوگوں کی جان گئی ہے۔