’4 ریاستوں میں ایک ساتھ انتخاب کرا نہیں سکتی اور پورے ملک میں کرانے کی بات کرتی ہے‘، مودی حکومت پر شرد پوار کا طنز

الیکشن کمیشن آف انڈیا نے جمعہ کے روز جموں و کشمیر اور ہریانہ میں اسمبلی انتخاب کی تاریخوں کا اعلان کر دیا۔ حالانکہ مہاراشٹر اور جھارکھنڈ میں بھی اسمبلی انتخابات ہونے ہیں، لیکن ان دونوں ریاستوں سے متعلق کوئی اعلان نہیں کیا گیا ہے۔ ایک سوال کے جواب میں الیکشن کمیشن نے کہا کہ چار مقامات پر ایک ساتھ انتخاب کرانے کے لیے سیکورٹی فورسز کی تعیناتی ایک بڑی دقت ہو سکتی ہے۔ اس لیے ابھی دو ریاستوں میں اسمبلی انتخاب کا اعلان کیا گیا ہے۔

اب اس معاملے میں این سی پی (ایس پی) چیف شرد پوار نے وزیر اعظم نریندر مودی اور مرکزی حکومت کو طنز کا نشانہ بنایا ہے۔ انھوں نے ایک بیان میں کہا کہ وزیر اعظم اپنی تقریر میں کہتے ہیں کہ پورے ملک کا انتخاب ایک ساتھ ہونا چاہیے۔ لیکن جموں و کشمیر اور ہریانہ میں ہی انتخاب کا اعلان کیا گیا، جھارکھنڈ اور مہاراشٹر میں انتخاب کی تاریخ نہیں بتائی گئی۔

شرد پوار نے کہا کہ حکومت چار ریاستوں میں اسمبلی انتخاب کرا ہی نہیں سکتی اور پورے ملک میں ایک ساتھ سبھی اسمبلیوں کے لیے انتخاب کرانے کی بات کرتی ہے۔ انھوں نے ’وَن نیشن، وَن الیکشن‘ (ایک ملک، ایک انتخاب) کے لیے نریندر مودی کو چیلنج بھی پیش کیا، ساتھ ہی انھوں نے یہ بھی کہا کہ ملک میں اس وقت امن کی ضرورت ہے۔

شرد پوار نے اپنی بات کو آگے بڑھاتے ہوئے کہا کہ لال قلعہ پر وزیر اعظم نے یہ بات رکھی کہ پورے ملک کے انتخاب ایک ساتھ ہونے چاہئیں۔ وزیر اعظم کو یہ بات کہے ابھی 12 گھنٹے بھی نہیں ہوئے تھے کہ الیکشن کمیشن نے جموں و کشمیر اور ہریانہ کے انتخاب کا اعلان کر دیا۔ لیکن جھارکھنڈ اور مہاراشٹر کی تاریخوں کا اعلان نہیں ہوا۔ جب وزیر اعظم سبھی ریاستوں میں ایک ساتھ انتخاب کرانے کی پالیسی تجویز کر رہے ہیں تو مہاراشٹر میں انتخاب کا اعلان نہ ہونا ایک طرح کا تضاد ظاہر کرتا ہے۔