شرد پوار نے ’زیڈ پلس‘ سیکورٹی لینے سے کیا انکار، سی آر پی ایف کے افسران کو لوٹایا

ممبئی: حال ہی میں مرکزی حکومت نے مہاراشٹر کے سابق وزیر اعلیٰ شرد پوار کو زیڈ پلس سیکورٹی دی تھی۔ اس کے بعد انہوں نے اس سیکورٹی کو لے کر مرکزی حکومت کو آڑے ہاتھوں لیا تھا۔ نیشنلسٹ کانگریس پارٹی (شرد چندر پوار) کے سربراہ شرد پوار نے زیڈ پلس سیکورٹی لینے سے انکار کر دیا ہے۔ ذرائع نے بتایا کہ پوار نے سی آر پی ایف افسران کو واپس لوٹا دیا۔

سرکاری ذرائع نے 21 اگست کو خبر رساں ایجنسی پی ٹی آئی کو بتایا تھا کہ مرکز نے شرد پوار کو زیڈ پلس سیکورٹی دی ہے۔ سنٹرل ریزرو پولیس فورس (سی آر پی ایف) کے 55 مسلح اہلکاروں کی ٹیم کو پوار کے زیڈ پلس سیکورٹی کور کے حصے کے طور پر رکھا گیا تھا۔ یہ قدم ان کی حفاظت کو مدنظر رکھتے ہوئے اٹھایا گیا ہے۔

مرکز سے سیکورٹی ملنے کے بعد شرد پوار نے 23 اگست کو جاسوسی کا خدشہ ظاہر کیا تھا۔ انہوں نے کہا تھا، “وزارت داخلہ کے ایک اہلکار نے مجھے بتایا کہ حکومت نے تین لوگوں کو زیڈ پلس سیکورٹی دینے کا فیصلہ کیا ہے اور میں ان میں سے ایک ہوں۔‘‘

انہوں نے طنزیہ انداز میں کہا تھا کہ "انتخابات قریب آ رہے ہیں، اس لیے یہ میرے بارے میں مستند معلومات حاصل کرنے کا ایک ذریعہ ہو سکتا ہے۔‘‘ خیال رہے کہ اس سال مہاراشٹر میں اسمبلی انتخابات ہونے والے ہیں۔