دہلی: جامع مسجد کے شاہی امام احمد بخاری نے لی کورونا کی پہلی خوراک

کورونا انفیکشن سے نمٹنے کے لیے ہندوستان میں زور و شور سے ٹیکہ کاری مہم جاری ہے۔ اس درمیان منگل کے روز دہلی جامع مسجد کے شاہی امام احمد بخاری نے کورونا ویکسین کی پہلی خوراک لے لی، اور لوگوں سے اپیل بھی کی کہ وہ جلد از جلد ٹیکہ لگوائیں تاکہ اس عالمی وبا سے محفوظ رہ سکیں۔ شاہی امام احمد بخاری نے میڈیا سے گفتگو کرتے ہوئے کہا کہ ’’میرا مقصد یہ ہے کہ لوگوں میں ٹیکہ کاری کو لے کر مثبت پیغام جائے اور وہ ٹیکہ لگوانے کے لیے آگے آئیں۔ سبھی لوگ کسی افواہ پر دھیان دیے بغیر کورونا کی ویکسین لگوائیں اور خود کو محفوظ کریں۔‘‘

قابل ذکر ہے کہ شاہی جامع مسجد کے امام احمد بخاری نے کے کورونا ٹیکہ لگوانے سے متعلق اطلاع ان کے صاحبزادے اور نائب سید شابان بخاری نے دی۔ انھوں نے اپنے ٹوئٹر اکاؤنٹ سے یہ جانکاری فراہم کرتے ہوئے لکھا کہ ’’شاہی امام احمد بخاری نے آج کورونا ویکسین کی پہلی خوراک لے لی ہے۔‘‘ ساتھ ہی سید احمد بخاری کے جانشیں سید شابان بخاری نے خود بھی ٹیکہ لگوانے کی خبر ٹوئٹر پر دی۔ انھوں نے اپنی تصویر شیئر کرتے ہوئے لکھا ہے کہ ’’الحمد اللہ آج میں نے نصف راستہ طے کرتے ہوئے اسپوتنک وی کی پہلی خوراک حاصل کر لی۔ آپ بھی ٹیکہ ضرور لگوائیں۔‘‘