دہلی سمیت شمالی ہند پر سردی کا شدید حملہ، درج حرارت میں 2 سے 3 ڈگری کی گراوٹ

نئی دہلی: جموں و کشمیر، ہماچل پردیش اور اتراکھنڈ میں شدید برف باری جاری ہے، جس کا اثر دہلی-این سی آر پر پڑ رہا ہے۔ دہلی میں درجہ حرارت میں 2-3 ڈگری کی گراوٹ درج کی گئی ہے۔ اس کے ساتھ ہی دہلی سمیت پورے شمالی ہندوستان میں شدید سردی کا دور شروع ہونے والا ہے۔ آئی ایم ڈی (محکمہ موسمیات) نے اس پر اہم الرٹ جاری کیا ہے۔ محکمہ موسمیات نے پیش گوئی کی ہے کہ آج کا کم سے کم درجہ حرارت 7 ڈگری سیلسیس رہنے جبکہ زیادہ سے زیادہ درجہ حرارت 17 ڈگری سیلسیس تک ہو سکتا ہے۔

محکمہ موسمیات کے مطابق دہلی کے آیا نگر اور رج میں کم سے کم درجہ حرارت 3 ڈگری کے آس پاس رہ سکتا ہے۔ زیادہ سے زیادہ درجہ حرارت 17 سے 18 ڈگری سیلسیس تک جا سکتا ہے۔ 16 جنوری کو اوسطا کم سے کم درجہ حرارت 5 ڈگری جبکہ زیادہ سے زیادہ 17 ڈگری سیلسیس ہو سکتا ہے۔ 17 جنوری کو کم سے کم درجہ حرارت 4 جبکہ زیادہ سے زیادہ 17 ڈگری سیلسیس اور 18 جنوری کو کم سے کم 4 اور زیادہ سے زیادہ 18 ڈگری رہنے کا امکان ہے۔

ہفتہ (14 جنوری) کو ہریانہ، چنڈی گڑھ، دہلی، اتر پردیش اور بہار اور مشرقی راجستھان اور مغربی مدھیہ پردیش کے کچھ علاقوں میں درجہ حرارت 7 سے 10 ڈگری ریکارڈ کیا گیا۔ مغربی راجستھان میں بیشتر مقامات پر درجہ حرارت 3-7 ڈگری کے درمیان رہا۔ چورو میں پارہ منفی 0.7 ڈگری سیلسیس ریکارڈ کیا گیا۔

اگلے 3 دنوں کے دوران شمال مغربی ہندوستان کے کئی حصوں میں کم سے کم درجہ حرارت میں 4-6 ڈگری سیلسیس کی کمی کا امکان ہے۔ اس کے بعد کوئی خاص تبدیلی نہیں آئے گی۔ اگلے 3 دنوں میں مدھیہ پردیش میں کم سے کم درجہ حرارت 3-5 ڈگری سیلسیس تک گر سکتا ہے۔ دریں اثنا، مشرقی ہندوستان کے کئی حصوں میں کم سے کم درجہ حرارت میں 2.4 ڈگری سیلسیس کی کمی کا امکان ہے۔

محکمہ موسمیات کے مطابق ایک تازہ ویسٹرن ڈسٹربنس 18 جنوری کی رات سے ہمالیائی خطہ کو متاثر کرے گا جس کی وجہ سے جموں و کشمیر اور اتراکھنڈ میں ہلکی بارش ہو سکتی ہے۔

محکمہ موسمیات کے مطابق دہلی میں 16 سے 18 جنوری کے درمیان سردی کی لہر آنے کا امکان ہے۔ 15 اور 18 جنوری کے درمیان راجستھان کے کچھ علاقوں اور 16-17 جنوری کو پنجاب اور ہریانہ میں شدید سردی کی لہر چل سکتی ہے۔ مغربی اتر پردیش 17 اور 18 جنوری کے درمیان سردی کی لپیٹ میں رہے گا۔

درجہ حرارت 19 جنوری سے ایک بار پھر بڑھنے کا امکان ہے۔ 19 جنوری کو کم سے کم اوسط درجہ حرارت 8 ڈگری جبکہ زیادہ سے زیادہ 19 ڈگری رہنے کا اندازہ ہے۔ محکمہ موسمیات کے مطابق 20 جنوری کو بھی صورتحال ایسی ہی رہے گی۔