راجیو گاندھی کی سالگرہ کے موقع پر راہل اور پرینکا سمیت کانگریس کے متعدد لیڈران نے پیش کیا خراج عقیدت

نئی دہلی: کانگریس کے سابق صدر راہل گاندھی اور پارٹی کی جنرل سکریٹری پرینکا گاندھی نے ہفتہ کے روز اپنے والد اور سابق وزیر اعظم راجیو گاندھی کی 78ویں سالگرہ پر خراج عقیدت پیش کیا۔ اس موقع پر راہول گاندھی اور پرینکا گاندھی ویر بھومی پہنچے اور سابق وزیر اعظم راجیو گاندھی کو گلہائے عقیدت پیش کئے۔

اس کے علاوہ رابرٹ واڈرا، رکن پارلیمنٹ کے سی وینوگوپال اور لوک سبھا میں قائد حزب اختلاف ملکارجن کھڑگے بھی ویر بھومی پہنچے اور سابق وزیر اعظم راجیو گاندھی کو یاد کرتے ہوئے انہیں خراج عقیدت پیش کیا۔

اس موقع پر راہل گاندھی نے ٹوئٹ کیا، ’’پاپا، آپ ہر لمحہ میرے ساتھ، میرے دل میں ہیں۔ میں ہمیشہ کوشش کروں گا کہ آپ نے ملک کے لیے جو خواب آپ نے دیکھا، اسے میں پورا کر سکوں۔‘‘ انہوں نے ٹوئٹ کے ساتھ راجیو گاندھی کی زندگی کے سفر سے متعلق ایک ویڈیو بھی شیئر کی۔

اس موقع پر کانگریس پارٹی کے ٹوئٹر ہینڈل پر بھی سابق وزیر اعظم راجیو گاندھی کو یاد کیا گیا۔ پارٹی کی طرف سے لکھا گیا ’’ہم ہندوستان کے سابق وزیر اعظم راجیو گاندھی کو ان کے یوم پیدائش پر یاد کر رہے ہیں۔ انہیں 21 ویں صدی کے ہندوستان کے طور پر سراہا جاتا ہے۔ ہندوستان میں آئی ٹی اور ٹیلی کام انقلاب کا آغاز، ان کی دور اندیشی کا نتیجہ ہے۔ آج ہم ان کی میراث کا جشن مناتے ہیں۔‘‘

خیال رہے کہ سابق وزیر اعظم راجیو گاندھی 20 اگست 1944 کو ممبئی، مہاراشٹر میں پیدا ہوئے۔ وہ ہندوستان کے ساتویں وزیر اعظم تھے۔ ان کے یوم پیدائش 20 اگست کو ہر سال ’سدبھاونا دیوس‘ کے طور پر منایا جاتا ہے۔