آن لائن ٹھگنے والے نائجیریائی گینگ کے سات ارکان گرفتار

ہریانہ پولس نے ضلع فرید آباد سے پانچ نائجیریائی باشندوں سمیت آن لائن فراڈ گینگ کے سات ممبروں کوگرفتار کرکے فیس بک پر غیر ملکی لڑکیوں کے نام سے دوستی کرنے اور مہنگے تحائف کا وعدہ کرنے والے ایک آن لائن فراڈ گینگ کا پردہ فاش کیا۔

ہریانہ پولس کے ترجمان نے آج یہاں بتایا کہ گرفتار ملزم کی شناخت لائبیریا کے شہری ولیمز مائیکل، نائجیریا کے شہری ایبری اوکولی عرف پرنس، حلیمت محمد، اوکے کے نینا بوگو اور کینچوکو اوکونٹا اور بلبھ گڑھ کے انوراگ اور نشانت کے طورپر ہوئی ہے۔ پولیس نے مائیکل اور اوکولی سے مختلف ممالک کے دو پاسپورٹ برآمد کیے ہیں جبکہ حلیمت کے پاسپورٹ کی میعاد ختم ہوگئی ہے۔ پانچوں نائجیریا ئی باشندے فرید آباد میں ایک مکان میں رہ رہے تھے۔ پ

ولیس ترجمان نے گینگ کی وارداتوں کے بارے میں بتایا کہ یہ دھوکہ باز غیر ملکی لڑکی کے نام پر فیس بک پروفائل بنا کر لوگوں سے دوستی کرتے تھے۔ اعتماد جیتنے کے بعد غیر ملکی سونے کے زیورات، موبائل فون، مہنگے تحائف کا وعدہ کرکے لالچ دیتے تھے۔ اس کے بعد اس کا ساتھی کسٹم آفیسر بن جاتا تھا اور گفٹ پارسل میں مہنگی اشیاء کے بدلے کسٹم ڈیوٹی، ایکسائز ڈیوٹی اور دیگر ٹیکس ادا کرنے کے نام پر ہندوستانی بینک کھاتوں میں رقم جمع کرنے کو کہتا اور اس طرح سے اسے ٹھگتا تھا۔

پولس نے 23 جولائی کو آن لائن فراڈ کی شکایت موصول ہونے کے بعد جعل سازوں کو پکڑنے کے لئے پولس ٹیم تشکیل دی تھی۔ شکایت میں متاثرہ لڑکی نے 35500 روپے کے دھوکہ دہی کا الزام لگایا ہے۔ ٹیکنالوجی پر مبنی معلومات کے ذریعہ پولس نے سات افراد کو گرفتار کیا، جن میں پانچ نائیجیریائی باشندے بھی شامل ہیں۔ پولس نے ان تمام ملزمان کو آج عدالت میں پیش کیا جہاں سے انھیں چار دن کے ریمانڈ پر بھیج دیا گیا ۔