جموں و کشمیر میں الگ الگ سڑک حادثے، 5 افراد کی موت، چار زخمی

سری نگر: جموں و کشمیر میں الگ الگ سڑک حادثات میں پانچ افراد جاں بحق جبکہ کم سے کم چار افراد زخمی ہوئے ہیں۔ ذرائع نے بتایا کہ شمالی کشمیر کے ضلع بانڈی پورہ کے حاجن علاقے میں گذشتہ شام دیر گئے ایک عمر رسیدہ شخص ٹریکٹر کی زد میں آ کر شدید زخمی ہوا۔

انہوں نے کہا کہ گرچہ اس کو علاج و معالجے کے لئے فوری طور پر نزدیکی ہسپتال منتقل کیا گیا لیکن وہاں موجود ڈاکٹروں نے اس کو مردہ قرار دیا۔ متوفی کی شناخت 60 سالہ محمد عبداللہ شیخ ولد غلام قادر شیخ ساکن مارکنڈل حاجن کے طور پر ہوئی ہے۔ پولیس نے اس ضمن میں ایک کیس درج کر کے تحقیقات شروع کی ہیں۔

ذرائع نے بتایا کہ رام بن میں سری نگر- جموں قومی شاہراہ پر مگر کوٹ کے نزدیک ایک کار حادثے کا شکار ہوئی جس کے نتیجے میں دو افراد کی موت جبکہ چار دیگر زخمی ہو گئے۔ انہوں نے کہا کہ یہ کار سری نگر جا رہی تھی اور اس میں سوار تمام سواریوں کا تعلق مہاراشٹر سے تھا۔ ان کا کہنا ہے کہ متوفین میں ڈرائیور اور ایک خاتون بھی شامل ہے۔

ذرائع نے بتایا کہ زخمیوں کو علاج و معالجے کے لئے سب ضلع ہسپتال بانہال منتقل کیا گیا ہے جن کی شناخت 35 سالہ نہا، 36 سالہ امان، 40 سالہ منشا اور 35 سالہ مگنا کے طور پر ہوئی ہے تاہم متوفین کی ابھی معلوم نہیں ہوئی ہے۔ ادھر ضلع ریاسی کے گلاب پور علاقے میں ایک اور سڑک حادثے میں دو افراد کی موت واقع ہوئی۔

ذرائع نے بتایا کہ ضلع ریاسی کے گلاب پور علاقے میں ایک ڈمپر بدھ کی صبح ڈرائیور کے کنٹرول سے باہر ہوکر گہری کھائی میں جا گرا جس کے نتیجے میں دو افراد کی موت واقع ہوئی۔ انہوں نے کہا کہ یہ ڈمپر بکورا سے سنگری کی طرف جا رہا تھا۔

متوفین کی شناخت 42 سالہ سریندر سنگھ ساکن پنجاب اور 26 سالہ منا کمار ساکن بہار کے طور پر ہوئی ہے۔ انہوں نے کہا کہ دونوں کی لاشوں کو نکال کر پوسٹ مارٹم کے لئے ہسپتال منتقل کیا گیا ہے۔ دریں اثنا پولیس نے اس ضمن میں ایک کیس درج کر کے تحقیقات شروع کی ہیں۔