پی ایم مودی کے آنسو دیکھ سابق آئی اے ایس افسر کو یاد آئی ’بندر اور مگرمچھ‘ کی کہانی

وزیر اعظم نریندر مودی گزشتہ دن کورونا وائرس پر ڈاکٹروں سے بات چیت کے دوران جذباتی ہو گئے تھے اور ان کی آنکھیں بھی نم ہو گئی تھیں۔ انھوں نے اس دوران کہا تھا کہ ’’اس کورونا وبا نے ہم سے ہمارے کئی اپنوں کو چھینا ہے۔‘‘ اس تعلق سے کئی طرح کی خبریں سامنے آ چکی ہیں اور اپوزیشن پارٹی لیڈروں نے ان کے آنسوؤں کو کئی طرح سے تنقید کا نشانہ بھی بنایا۔ اب ایک سابق آئی اے ایس افسر نے پی ایم مودی کے آنسوؤں پر طنز کرتے ہوئے اسے مگرمچھ کے آنسو ٹھہرانے کی کوشش کی ہے۔ دراصل پی ایم مودی کے آنسو دیکھ کر انھیں ’بندر اور مگرمچھ‘ کی کہانی یاد آ گئی اور پھر انھوں نے اس تعلق سے دو ٹوئٹ کر ڈالے۔

پی ایم مودی کے آنسوؤں پر طنز کے تیر سابق آئی اے ایس افسر سوریہ پرتاپ سنگھ نے چلائے ہیں۔ انھوں نے اپنے ٹوئٹ میں لکھا ہے کہ ’’بندر کا کلیجہ اور مگرمچھ کی کہانی سنی ہے نہ۔ آپ کو بندر سمجھ، پھر سے پیٹھ پر بٹھانے کے لیے ہیں یہ آنسو۔‘‘ ایک دیگر ٹوئٹ میں انھوں نے یہاں تک لکھ دیا کہ ’’اصل میں مگرچھ کی بی بی نے بندر کا کلیجہ لانے کی فرمائش کی تھی، یہ سوچ کر کہ جب بندر اتنی میٹھی، رسیلی جامن کھاتا ہے تو اس کا کلیجہ کتنا میٹھا ہوگا۔ آج کے حالات میں فرق صرف اتنا ہے کہ کلیجہ ’کسی اور‘ کو نہیں، خود کو چاہیے۔‘‘

سبکدوش آئی اے ایس سوریہ پرتاپ سنگھ کے اس ٹوئٹ کو لے کر سوشل میڈیا پر خوب تبصرے ہو رہے ہیں۔ ایک سوشل میڈیا یوزر نے سوریہ پرتاب کے ٹوئٹ پر کمنٹ کرتے ہوئے لکھا ہے کہ ’’2024 آتے آتے پھر سے لوگ ان کی تعریف کرنا شروع کر دیں گے اور ووٹ انھیں کو دیں گے۔‘‘ ایک دیگر یوزر نے لکھا ’’منھ میں رام بغل میں چھری، مودی جی عوام کو لوٹنے کا کوئی موقع نہیں چھوڑ رہے ہیں۔‘‘