کشمیر: حالیہ ہلاکتوں کے بعد وادی میں سیکورٹی کے سخت انتظامات

سری نگر: حالیہ ہلاکتوں کے پیش نظر وادی کے قرب و جوار بالخصوص حساس اضلاع میں سیکورٹی بندوبست کو مزید سخت کر دیا گیا ہے۔ شہر میں جہاں ناکوں کے جال کو مزید توسیع دی گئی ہے، وہیں حساس مقامات پر سیکورٹی کی نفری میں بھی اضافہ کیا گیا ہے اور انہیں مزید چوکنا بھی رکھا گیا ہے۔

یو این آئی اردو کے ایک نامہ نگار نے مختلف علاقوں کا دورہ کرنے کے بعد بتایا کہ سری نگر سمیت وادی کے باقی اضلاع میں سیکورٹی بندوبست کو مزید سخت کر دیا گیا ہے۔ انہوں نے کہا کہ بعض مقامات پر سیکورٹی فورسز اہلکار اسکوٹر سواروں کو روک کر ان کے بیگوں کی تلاشی لے رہے ہیں۔

موصوف نامہ نگار نے کہا کہ سیکورٹی فورسز اہلکار مشکوک نظر آنے والے راہگیروں کو بھی روک کر ان کی جامہ تلاشی اور ان کے شناختی کارڈ چیک کرنے کے بعد انہیں اپنی اپنی منزلوں کی طرف جانے کی اجازت دیتے ہیں۔ ذرائع نے بتایا کہ شہر سری نگر میں سی سی ٹی وی کیمروں کے ذریعے لوگوں پر نظر گزر رکھی جا رہی ہیں۔

معلوم ہوا ہے کہ شہر کے داخلی اور خارجی راستوں پر سیکورٹی فورسز کی تعیناتی عمل میں لا کر راہگیروں اور گاڑیوں کی باریک بینی سے تلاشی لی جا رہی ہیں۔ دریں اثنا جنوبی کشمیر کے چار اضلاع شوپیاں، کولگام ، اننت ناگ اور پلوامہ میں بھی سیکورٹی فورسز کو مستعد رہنے کے احکامات صادر کئے گئے ہیں۔

ذرائع نے بتایا کہ پچھلے ایک ہفتے کے دوران کولگام اور کھنموہ میں دو سرپنچ اور ایک ڈپٹی سرپنچ کے علاوہ کھاگ بڈگام میں ٹریٹوریل فوجی اہلکار اور شوپیاں میں سی آر پی ایف اہلکار کی ہلاکت کے بعد سیکورٹی صورتحال کا از سر نو جائزہ لیا جا رہا ہے۔ ذرائع کا کہنا ہے کہ سرگرم ملی ٹنٹوں اور اُن کے معاونین کے خلاف پوری وادی میں بڑے پیمانے پر آپریشن شروع کیا گیا ہے تاکہ امکانی حملوں کو رونما ہونے سے پہلے ہی ٹالا جاسکے۔ ذرائع نے بتایا کہ پوری وادی میں سیکورٹی فورسز کو چوکس رہنے کے احکامات صادر کئے گئے ہیں تاکہ عوامی نمائندوں پر ہو رہے حملوں کو روکا جاسکے۔

ذرائع کے مطابق جن سرپنچوں اور پنچوں کو سیکورٹی فراہم کی گئی ہیں اُنہیں آگاہ کیا گیا کہ اگر وہ کہیں پر جانا چاہتے ہیں تو اس بارے میں پولیس کو پیشگی اطلاع فراہم کریں۔ بتا دیں کہ حالیہ دنوں کے دوران ملی ٹنٹ سرگرمیوں سے جہاں عوامی نمائندوں میں خوف و دہشت پھیل گئی ہے وہیں سیکورٹی فورسز بھی ہائی الرٹ پر ہیں۔