نئے ٹرانسپورٹ قوانین: 15 ہزار کی اسکوٹی، 23 ہزار کا چالان!

نئی دہلی: ملک میں یکم ستمبر سے ٹرانسپورٹ کے نئے ضابطوں کا نفاذ عمل میں آ گیا ہے۔ اب ٹرانسپورٹ (نقل و حمل) کے ضابطوں کی خلاف ورزی کرنا کتنا بھاری پڑ سکتا ہے وہ اس خبر سے سمجھا جاسکتا ہے۔ مشرقی دہلی کے گیتا کالونی میں رہنے والے دنیش مدان نامی شخص کا ٹرانسپورٹ کے ضابطوں کی خلاف ورزی کرنے کے نتیجے میں گڑگاؤں (گروگرام) میں چالان کٹا۔ چالان کی رقم جتنی ہے اتنی تو اس کی اسکوٹی کی قیمت بھی نہیں!

گیتا کالونی میں رہنے والے دنیش دہلی سے متصل گڑگاؤں گئے تھے۔ وہاں ان کا چالان کٹ گیا۔ چالان گڑگاؤں کے ضلع عدالت کے پاس ہوا ہے۔ مختلف ضابطوں کی خلاف ورزی کے معاملوں میں کل 23 ہزار روپیے کا چالان کیا گیا۔

دنیش دوپہیہ تو چلا رہا تھا مگر اس کے پاس نہ تو لائسنس تھا، نہ ہی گاڑی کے رجسٹریشن کے مصدقہ کاغذات (آر سی) اور نہ ہی بیمہ کے کاغذات تھے۔ علاوہ ازیں پولیوشن سے متعلق مصدقہ کاغذات بھی نہیں تھے۔ ان تمام پر طرہ یہ کہ دنیش نے ہیلمیٹ بھی نہیں پہنا ہوا تھا۔

نئے ضابطوں کے مطابق بغیر لائسنس اور آر سی نہ ہونے کا پانچ پانچ ہزار روپیے، گاڑی بیمہ نہ ہونے کا دو ہزار اور ماحولیات کے مصدقہ کاغذات نہ ہونے کا 10 ہزار روپیے کا چالان کیا گیا ہے۔ بغیر ہیلمیٹ کا چالان ایک ہزار روپیے کا ہے اور اس طرح کل 23 ہزار روپیے کا چالان کیا گیا۔

چالان دو ستمبر کو دوپہر کے بعد 12 بجکر 55 منٹ پر ہوا ہے۔ چالان کٹنے کی جگہ ضلع عدالت کے مخالف سمت میں ہے۔ چالان پر دنیش مدان نے کہا کہ اسکوٹی کی قیمت ہی 15 ہزار کی ہے تو میں 23 ہزار کا چالان کیوں بھروں؟ خیر پولس نے تو چالان کاٹ دیا ہے۔ دنیش کا عدالت کے لیے چالان ہوا ہے اور انہوں نے ابھی جمع نہیں کیا ہے۔